Ağ corabları təmiz saxlamaq çoxlarının problemidir. Nə qədər yusaq da, zamanla corabların dabanı qaralır, rəngi solur və əvvəlki ağlığı qalmır. Xüsusilə ağ corablar tez çirkləndiyi üçün onları təmiz saxlamaq daha çətin olur. Amma bu problemin sadə və əlçatan bir həlli var.

Patrul.az-ın araşdırmasına görə, ağ corabları yenidən ağartmaq üçün bahalı vasitələrə ehtiyac yoxdur. Bunun üçün evdə tapılan yuyucu soda kifayətdir.

Yuyucu soda çirki yaxşı həll edir və corabların üzərindəki boz-qəhvəyi ləkələri təmizləməyə kömək edir. Ən təsirli üsul isə corabları yumazdan əvvəl təxminən 30 dəqiqə ilıq suda yuyucu soda ilə islatmaqdır. Bu zaman çirk yumşalır və parça liflərindən asanlıqla çıxır. Daha sonra corabları adi qaydada paltaryuyan maşında yumaq kifayətdir.

Əgər corablar çox qaralıbsa, köhnə, amma təsirli bir üsul da var. Bunun üçün corabları yuyucu soda qatılmış suda qısa müddətə qaynatmaq olar. Bu üsul əvvəllər tez-tez istifadə olunub və xüsusilə çox çirklənmiş corablarda yaxşı nəticə verir.

Bir sözlə, yuyucu sodadan vaxtaşırı istifadə etmək corabların daha uzun müddət ağ qalmasına kömək edir. Üstəlik, bu üsul kimyəvi ağardıcılara nisbətən parçaya daha az zərər verir.