Patrul.az redaksiyasına göndərilən videogörüntülərdə Heydər Əliyev prospektində hərəkətdə olan 99-K-869 dövlət qeydiyyat nişanlı motosikletin sürücüsünün hərəkət zamanı mobil telefonla məşğul olduğu açıq şəkildə görünür. Bu cür davranış təkcə sürücünün öz həyatı üçün deyil, eyni zamanda yolun digər iştirakçıları üçün də ciddi təhlükə yaradır.

Motosiklet idarə edərkən diqqətin bir anlıq yayınması belə ağır nəticələrə səbəb ola bilər. Avtomobillərlə müqayisədə daha az qorunmaya malik olan motosiklet sürücüləri üçün telefonla danışmaq və ya ekrana baxmaq ölüm riski deməkdir. Yüksək sürət, sıx nəqliyyat və gözlənilməz manevrlər fonunda bu cür məsuliyyətsizlik faciə ilə nəticələnə bilər.

Unudulmamalıdır ki, yol hərəkəti qaydaları səbəbsiz yazılmayıb. Sükan arxasında telefonla məşğul olmaq təkcə cərimə riski deyil, insan həyatına başa gələ biləcək məsuliyyətsiz seçimdir. Bu kimi halların qarşısının alınması üçün sürücülər öz davranışlarına daha ciddi yanaşmalı, təhlükəsizliyi hər şeydən üstün tutmalıdırlar.