Bu gün Abşeron rayonu, Saray qəsəbəsi yaxınlığında sərnişin avtobusunda baş verən yanğın bir daha nəqliyyat vasitələrində təhlükəsizlik məsələsini gündəmə gətirdi. Bir çoxlarının ağlında isə eyni sual yaranır: avtomobil və avtobuslar doğrudan da “durduq yerə” yanırmı, yoxsa bunun arxasında konkret səbəblər dayanır?

Patrul.az mövzu barədə araşdırma edib.

Mütəxəssislərin fikrincə, nəqliyyat vasitələrində baş verən yanğınlar heç vaxt səbəbsiz olmur. Ən əsas risk faktorlarından biri texniki nasazlıqlardır. Xüsusilə köhnə avtomobillərdə və istismar müddəti çox olan avtobuslarda elektrik naqillərinin aşınması, izolyasiyanın sıradan çıxması qısaqapanmaya səbəb olur. Bu isə bir anda alovlanma ilə nəticələnə bilər. Elektrik sistemində baş verən ən xırda problem belə yüksək temperatur fonunda ciddi təhlükəyə çevrilir.

Digər mühüm səbəblərdən biri yanacaq sistemindəki nasazlıqlardır. Yanacaq borularında sızma, filtr və ya nasos problemləri, mühərrikə yaxın hissələrdə benzin və ya dizelin yığılması yanğın riskini dəfələrlə artırır. Xüsusilə isti havalarda və ya uzunmüddətli hərəkət zamanı mühərrikin həddindən artıq qızması bu riski daha da gücləndirir.

Avtobus və avtomobillərdə yanğına səbəb olan amillərdən biri də texniki baxışların vaxtında keçirilməməsidir. Nəqliyyat vasitəsi mütəmadi texniki nəzarətdən keçmədikdə, xırda nasazlıqlar vaxtında aşkar olunmur və bu problemlər sonradan daha ciddi fəsadlara yol açır. Təəssüf ki, bəzi hallarda qənaət məqsədilə orijinal ehtiyat hissələri əvəzinə keyfiyyətsiz detalların istifadəsi də təhlükəni artırır.

Bundan əlavə, sürücülərin ehtiyatsız davranışları da yanğınlara yol aça bilər. Avtomobildə əlavə elektrik avadanlıqlarının – qeyri-standart işıqlandırma, səs sistemləri və ya istilik cihazlarının düzgün quraşdırılmaması elektrik yükünü artıraraq yanğına səbəb ola bilər. Həmçinin avtomobildə alışan maddələrin saxlanılması da risk yaradan faktorlardandır.

Mütəxəssislər vurğulayır ki, nəqliyyat vasitələrində baş verən yanğınların qarşısını almaq üçün ən effektiv yol mütəmadi texniki baxış, peşəkar servis xidmətlərindən istifadə və təhlükəsizlik qaydalarına əməl etməkdir. Avtobus və avtomobillərdə yanğınsöndürən balonun mövcudluğu və işlək vəziyyətdə olması isə fövqəladə hallarda insan həyatını xilas edə biləcək əsas vasitələrdən biridir.

Bir sözlə, avtomobil və avtobusların “durduq yerə” yanması mifdən başqa bir şey deyil. Hər yanğının arxasında konkret texniki və ya insan amili dayanır. Baş verən son hadisələr isə bir daha göstərir ki, nəqliyyat təhlükəsizliyinə laqeyd yanaşmaq ağır nəticələrə səbəb ola bilər.

Ləman Sərraf