Yaz fəslinin gəlişi ilə birlikdə günəş şüalarının güclənməsi, havada tozcuqların artması və avtomobillərdə kondisionerin aktiv istifadəsi sürücülər üçün gözlənilməz problemlər yarada bilər.

Patrul.az-ın məlumatına görə, oftalmoloqlar xəbərdarlıq edir ki, bu amillər təkcə narahatlıq deyil, hətta görmənin müvəqqəti zəifləməsinə də səbəb ola bilər. Buna görə də gözlərdə yaranan ilk qıcıqlanma əlamətlərini diqqətdən kənarda qoymaq olmaz.

Sükan arxasında uzun müddət vaxt keçirən şəxslərdə görmə orqanlarına düşən yük bir neçə dəfə artır. Üstəlik, risklər təkcə açıq havada deyil, avtomobil salonunun daxilində də mövcuddur.

Yaz aylarında ən geniş yayılmış problemlərdən biri allergik konyunktivitdir. Qaşınma, göz yaşarması və göz qapaqlarında şişkinlik kimi simptomlar bir çox insana tanışdır. Mütəxəssislər bildirir ki, sürücülər xüsusilə, çiçəkləmə dövründə pəncərə açıq halda hərəkət etdikdə bu problemlə daha çox qarşılaşırlar. Tozcuqlar birbaşa gözə daxil olaraq allergik reaksiyanı gücləndirir. Belə hallarda ən düzgün addım avtomobilin şüşələrini bağlı saxlamaq və salon filtrinin təmizliyinə diqqət yetirməkdir.

Bununla yanaşı, yazda kəskinləşən keratokonyunktivit daha ciddi nəticələrə gətirib çıxara bilər. Bu zaman yalnız selikli qişa deyil, həm də buynuz qişa zədələnir. Nəticədə görmə bulanıqlaşır, güclü işıq həssaslığı yaranır və gözə sanki qum dolmuş kimi hiss edilir. Ağır hallarda toxumaların zədələnməsi mümkündür. Həkimlər ağrı və ya işığa qarşı yüksək həssaslıq yaranarsa, mütləq vaxt itirmədən həkimə müraciət etməyi tövsiyə edir.

Paradoksal görünsə də, yaz aylarında “quru göz sindromu” da geniş yayılır. Ətraf mühitdə rütubətin artmasına baxmayaraq, kondisionerin işləməsi zamanı yaranan hava axını göz yaşının buxarlanmasını sürətləndirir. Bu isə yanma, sancma hissi yaradır. Orqanizm buna göz yaşarması ilə reaksiya verir ki, bu da çox vaxt allergiya ilə səhv salınır.

Mütəxəssislər virus mənşəli riskləri də unutmağı məsləhət görmür. Yazda gözlərin qızarması tez-tez allergiya ilə əlaqələndirilsə də, bəzi hallarda səbəb adenovirus konyunktiviti olur. Belə vəziyyətlərdə gigiyena əsas qoruyucu vasitədir: əlləri tez-tez yumaq, sükan və qapı tutacaqları ilə təmasdan sonra üzə toxunmamaq, şəxsi dəsmallardan istifadə etmək vacibdir.

Sürücülər üçün ayrıca risk amili də güclü yaz günəşidir. Gün işığının artması və yaş asfaltın, yaxud avtomobil kapotunun yaratdığı parıltı görməyə ciddi yük salır. Güclü ultrabənövşəyi şüalar buynuz qişanın zədələnməsinə – fotokeratitə səbəb ola bilər. Bu cür risklərin qarşısını almaq üçün oftalmoloqlar avtomobildə mütləq UV filtrli keyfiyyətli gün eynəklərinin olmasını və ön şüşənin daim təmiz saxlanmasını tövsiyə edir.

Yazın gözəllikləri ilə yanaşı, sağlamlıq üçün yaratdığı bu gizli riskləri nəzərə almaq sürücülər üçün həm rahatlıq, həm də təhlükəsizlik baxımından son dərəcə vacibdir.

Aynur Nadirqızı