İspaniyada minlərlə insan ölkədə dərinləşən mənzil böhranına etiraz etmək üçün küçələrə axışıb.

Patrulaz.az xarici KİV-ə istinadla xəbər verir ki,
etirazçılar sərfəli mənzilə çıxışın təmin olunmasını və əmlak spekulyasiyasına son qoyulmasını tələb edirlər.

Madriddə keçirilən ümummilli yürüşdə təşkilatçıların məlumatına görə, 150 minə yaxın insan iştirak edib. Həmçinin ölkənin 40-dan çox şəhərində daha kiçik miqyaslı aksiyalar keçirilib. “Mənzil reketinə son!” və “Ev sahibləri günahkardır, hökumət cavabdehdir” kimi şüarlarla çıxış edən etirazçılar hökumətdən konkret tədbirlər görməyi tələb ediblər.

Madrid kirayəçiləri həmkarlar ittifaqının sözçüsü Valeria Racu çıxışında deyib:
“Bu, mənzil biznesinin sonunun başlanğıcıdır. Mülkə sahibsizliyi və maaşlarımızı yeyən bu parazit sistem olmadan daha ədalətli bir cəmiyyət qurmaq mümkündür.”

Həmkarlar ittifaqı bildirir ki, hazırda İspaniyada 1,4 milyon ailə gəlirinin 30%-dən çoxunu mənzil xərclərinə sərf edir. Bu göstərici 10 il əvvəl 200 min ailə idi. Rəsmi statistika Madriddə 15 minə yaxın qeyri-qanuni turist mənzilinin olduğunu, Barselona Şəhər Şurasının isə 2028-ci ildən etibarən 10 min turist mənzilinin lisenziyasını yeniləməyəcəyini göstərir.

Xatırladaq ki, Balear və Kanar adaları, eləcə də Barselona kimi turist axınının yüksək olduğu bölgələrdə başlayan mənzil problemi zamanla ölkənin digər şəhərlərinə – Sevilya, Valensiya, Santyaqo de Kompostela, Burqos və San Sebastiána da yayılıb. Balear adalarında son beş ildə kirayə qiymətləri 40% artaraq ayda təxminən 1400 avroya çatıb. Bu məbləğ regionda əsasən turizm sektorunda çalışanların orta aylıq əmək haqqından yüksəkdir.

Qeyd edək ki, Barselonada keçirilən etiraz aksiyasında iştirakçılar kirayələrin 50% azaldılmasını, qeyri-müəyyən icarə haqlarının ləğvini və əmlak spekulyasiyasına son qoyulmasını tələb ediblər.

Gülbəniz Səfərova