Günə necə başladığımız, əslində bizim özümüzdən asılıdır. Səhərlər qəbul etdiyimiz içkilər bədənimizin oyanmasına, metabolizmanın işə düşməsinə və enerjimizin tənzimlənməsinə təsir edir. Lakin bəzi vərdişlər, xüsusilə də acqarına qəbul edilən bəzi içkilər, fayda əvəzinə ciddi fəsadlara səbəb ola bilər.

Patrulaz.az olaraq bu məsələ ilə bağlı mütəxəssislərin fikirlərinə əsaslanan araşdırma apardıq. Məlum oldu ki, səhər acqarına qəbul edilən bəzi içkilər mədə-bağırsaq sistemini qıcıqlandırır, həzm prosesinə zərər verir, bəzən isə ürək-damar və sinir sisteminə qədər mənfi təsir göstərir.

Səhər acqarına qəbul edilməməsi tövsiyə olunan içkiləri təqdim edirik:

Qəhvə 

Qəhvə insanın yuxusunu qaçıran əsas vasitədir. Lakin acqarına içildikdə, tərkibindəki kofein mədə turşusunun ifrazını artırır. Bu isə qastrit və reflü riskini yüksəldir; Mədə qıcqırması, yanma və narahatlıq hissi yaradır; Həssas mədə divarını zədələyir.

Diyetoloqlar qeyd edir ki, qəhvə yalnız yüngül səhər yeməyindən sonra qəbul edildikdə faydalı ola bilər.

Limonlu su 

Limonlu suyun sağlamlığımıza xeyiri olsa da, acqarına qəbul edildikdə mədənin selikli qişasını qıcıqlandırır. Xüsusilə qastrit və turşuluq problemi olanlarda ağrı yaradır. Diş minasını incəldir, çürümə riskini artırır.

Bu səbəbdən limonlu suyu səhərlər deyil, gün ərzində, yeməkdən sonra içmək məsləhətdir.

Soyuq su 

İnsanlar səhər içdikləri soyuq su ilə təravətlənmək istəyir. Ancaq soyuq su acqarına qəbul edildikdə mədə əzələlərində spazma səbəb ola bilər. Soyuq su həzm prosesini yavaşladır, hətta mədə ağrıları ilə müşayiət oluna bilər.

Mütəxəssislər günə ilıq və ya otaq temperaturunda su ilə başlamanı tövsiyə edirlər.

Enerji içkiləri 

Enerji içkiləri səhərlər bir çox insan üçün süni güc kimi qəbul edilir. Lakin bu içkilərin tərkibində:

Yüksək miqdarda kofein və şəkər olur,

Bu da acqarına qəbul edildikdə qan təzyiqini artırır,

Ürək döyüntüsünü pozur,

Qaraciyərə və mədəyə zərər verir.

Həkimlər bu içkilərin ümumiyyətlə gündəlik qidalanmadan çıxarılmasını tövsiyə edir.

Qazlı içkilər və konsentrat meyvə şirələri 

Bir çox insan səhər meyvə şirəsi və ya sərin qazlı içkilərlə günə başlamağı seçir. Amma qazlı içkilər mədədə qaz yığır, şişkinlik və narahatlıq yaradır. Konsentrat şirələrdə olan fruktoza qaraciyəri yükləyir və insulinə təsir edir. Ən pisi odur ki, bunlar mədə turşusunun miqdarını artıraraq, həzm pozğunluqlarına yol açır. Mütəxəssislər yalnız təbii və evdə sıxılmış meyvə şirəsini, o da yeməkdən sonra qəbul etməyi məsləhət görür.

Araşdırmalar göstərir ki, səhər acqarına ən təhlükəsiz və faydalı içki ilıq sudur. Bu həm mədəni qoruyur, həm də orqanizmi zərif şəkildə oyadır, həzmi və metabolizmanı tənzimləyir.

Yuxarıda sadalanan içkilər isə səhər acqarına deyil, uyğun vaxtda və düzgün şəkildə qəbul edilməlidir ki, sağlamlığımıza ziyan vurmasın.

Gülbəniz Səfərova