Meyxanaçı Ağakərim (Kərim Novruzov) vəfat edib.

Patrul.az-ın məlumatına görə, bu barədə Manset.az-a onun yaxınları məlumat verib.

2017-ci ilin martında meyxanaçı Ağakərimin beyninə qan sızıb. Həmin gündən ifaçının səhhətində ciddi problemlər yaranıb.

İlin son günlərində aldığımız bu xəbər 2025-ci ildə aramızdan ayrılan digər məşhurları xatırlamağımıza səbəb oldu.

Təbii ki, 2025-ci il uğurlarla yanaşı, Azərbaycan üçün mədəniyyət, sənət, kino və ictimai həyat sahələrində bir çox tanınmış simanın dünyasını dəyişməsi ilə də yadda qaldı. Onlar öz peşəkarlıqları, yaradıcılıqları və insanlara verdikləri təsirlə xalqın yaddaşında qalacaq izlər buraxdılar.

Patrul.az bu il dünyasını dəyişən azərbaycanlı məşhurları sizə təqdim edir:

Bu ilin əvvəlində tanınmış aktyor Azər Baxşəliyev dünyasını dəyişdi. O, “Bozbash Pictures” kimi sevilən layihədə Ağsaqqal və Əzəmət obrazları ilə tamaşaçıların qəlbinə yol tapmışdı və bir çoxlarının xatirəsində gülüş, xatirə və istedad sahibi kimi qaldı.

Yanvarın 15-də aktrisa Çimnaz Sultanova bağırsaq xərçəngi ilə mübarizədə məğlub oldu. 43 yaşında vəfat edən Sultanova televiziya və teatr tamaşaçısı üçün yadda qalan rollarla tanınırdı, onun gülüşü və performansları izləyicilər tərəfindən unudulmaz sayılırdı.

Fevral ayında Əməkdar jurnalist Yasin Qaraməmmədli həyatla vidalaşdı. Uzun illər medianın inkişafına xidmət etmiş Qaraməmmədli jurnalistikanın dəyərli səsi idi.

Eyni günlərdə 87 yaşında Ədalət Partiyasının sədri və keçmiş baş prokuror İlyas İsmayılov dünyasını dəyişdi – ölkənin hüquq və dövlət idarəçiliyi sahəsində uzunmüddətli xidmətləri ilə tanınmışdı.

Martın 16-sı isə elm və incəsənət dünyasında iki böyük itki yaşandı: Xalq artisti Ənvər Həsənov və Əməkdar incəsənət xadimi Ziyadxan Əliyev çoxillik yaradıcılıq yolu ilə xalq tərəfindən sevilən sənətkarlar idilər.

2025-ci ildə vəfat edənlər arasında Xalq artisti Arif Babayev də oldu. Xanəndə uzun sürən xəstəlikdən sonra 87 yaşında vəfat etdi. O, I Fəxri Xiyabanda dəfn edildi.

Martın 17-də isə rəssam Nağdəli Xəlilov 79 yaşında həyatını itirdi. Onun tabloları və yaradıcılığı Azərbaycan rəngkarlığında özünəməxsus yerə sahib idi.

2025-ci ildə vəfat edən başqa bir tanınmış sima isə bədii qiraətçi Əminə Yusifqızıdır. Xalq artisti bu il 89 yaşında dünyasını dəyişib. Əminə Yusifqızı Qurd Qapısı qəbiristanlığında dəfn olunub.

Görkəmli yazıçı, nasir, dramaturq Elçin Əfəndiyev də bu il dünyasını dəyişib. O 82 yaşında vəfat edib. Yazıçı I Fəxri Xiyabanda dəfn olunub. Elçin Əfəndiyev 1993-2018-ci illərdə Azərbaycan Respublikası Baş nazirinin müavini vəzifəsində çalışıb. O 1999-cu ildə Parisdə YUNESKO xətti ilə beynəlxalq səviyyədə təntənəli qeyd edilən “Dədə Qorqud” simpoziumuna sədrlik edib.

Aprelin 24-də rejissor Nicat Rzazadə, iyunun 28-də tanınmış təhsil eksperti Nadir İsrafilov, iyulun 8-də isə gənc şair Həsən Kür dünyasını dəyişdi. Onların hər biri öz sahəsində yaratdıqları ilə cəmiyyətin inkişafına töhfə vermişdi.

Eyni ayda 19 iyulda 92 yaşında şair-publisist Soltan Abbas da aramızdan ayrıldı. İyulun 24-də isə siyasi və ictimai fəaliyyət sahəsində tanınmış Xanhüseyn Kazımlı həyatını itirdi. Onun siyasətdəki iştirakları və ictimai fəaliyyəti geniş yadda qaldı.

49 yaşlı aktyor bu ilin sentyabrında vəfat etdi. O Səbail rayonu Üzeyir Hacıbəyli küçəsində yerləşən idman zalında infarkt keçirdi. Hadisə yerinə təcili tibbi yardım briqadası çağırılsa da, aktyor ürək tutmasından vəfat etdi. O Yasamal qəbiristanlığında dəfn edilib. Cabir İmanov 2001-ci ildən “Planet Parni iz Baku” KVN Teatrının aktyorudur. Bundan başqa “Məhəllə”, “Məhəllə 2 Moskvada”, “Ölülər XXI əsr”,”Ağanatiq”, “Bəxt üzüyü 2”, “Məhəllə 3”, “Ağanatiq 2” kimi fimlərdə rol alıb.

Bir çox başqa sahələrdən də tanınmış simalar ötən il ərzində aramızdan ayrıldı. Məsələn, Xalq artisti, pedaqoq və balet ustası Tamilla Şirəliyeva martın 12-də vəfat etdi və onun qoyduğu irs Azərbaycan sənətini zənginləşdirdi.

Bu unudulmaz şəxslər 2025-ci ildə gözlərini bu dünyaya əbədi yumdular, amma onların sənəti, rolu və həyata gətirdikləri dəyərlər hələ çox illər boyu xalqın ürəyində yaşayacaq. Onların xatirəsi bizim üçün həm ilham, həm də nəsillər üçün örnək olmağa davam edəcək.

Ləman Sərraf