Qış mövsümü yaxınlaşdıqca avtomobillərə diqqət daha da vacib olur. Soyuq hava, şaxta və buz sürücülük şəraitini çətinləşdirdiyi üçün maşını vaxtında qışa hazırlamaq həm təhlükəsizlik, həm də qənaət deməkdir.

Patrul.az avtomobilinizi qışa necə hazırlamalı olduğunuz barədə araşdırma edib.

İlk növbədə, təkərləri yoxlamaq lazımdır. Yay təkərləri soyuqda bərkiyir və yolda sürüşməyə səbəb olur. Buna görə qış təkərləri taxmaq vacibdir. Onlar daha yumşaq rezinlə hazırlandığından yola daha yaxşı yapışır.

İkinci addım isə soyuducu və antifriz sisteminin yoxlanmasıdır. Donmuş mühərrik avtomobilin ən baha başa gələn problemlərindən biridir. Antifriz səviyyəsini düzgün saxlamaq mühərriki qoruyur.

Akkumulyator da qışda tez boşalır. Əgər batareya köhnədirsə, qış gəlməmiş dəyişmək yaxşıdır. Həmçinin, şüşə silənlər və buzəleyhinə maye də mühüm detallardır — dumanlı və şaxtalı havada görmə qabiliyyətini qoruyur.

Sonda isə fənərləri, əyləcləri və havalandırma sistemini yoxlamaq lazımdır. Kiçik bir nasazlıq qışda böyük problem yarada bilər.

Qışa hazır avtomobil təhlükəsiz səfərin təminatıdır. Maşına bir az qayğı göstərmək təkcə texniki deyil, həm də sürücülük mədəniyyətinin göstəricisidir.

Ləman Əlizadə