Keniyada qeyri-adi hadisə baş verib.

Patrulaz.az “Reuters”ə istinadən xəbər verir ki, Keniyada dörd nəfər məhkəmə tərəfindən minlərlə kraliça qarışqanı qanunsuz yolla alver etməyə çalışdıqları üçün 7700 dollar cərimələniblər.

Qarışqalar qanunsuz şəkildə Avropa, Asiya və Şimali Amerikada formikarium adlanan şəffaf koloniyalarda saxlanılaraq satılır.

Məlumata görə, bu növ bioticarət Keniyanın ekosisteminə ciddi zərər verə bilər.

Məhkəmə hakimi Njeri Thuku bildirib: “Bu, təkcə vəhşi təbiət ticarəti deyil, həm də biopiratlıq əlamətləri daşıyan mütəşəkkil bir sxemdir. Əgər bu şəxslər cəriməni ödəməsələr, 12 ay azadlıqdan məhrum ediləcəklər”.

Qeyd edək ki, kraliça qarışqalar yalnız koloniyanın çoxalmasını təmin edə bildiyi üçün çox qiymətlidir və onların qanunsuz çıxarılması yerli təbiətə və qarışqa koloniyalarının davamlılığına təhlükə yaradır. Bu hadisə, vəhşi təbiət ticarətində daha az tanınan, lakin yüksək gəlirli növlərə marağın artdığını göstərir.

Gülbəniz Səfərova