Azərbaycan Prezidenti İlham Əliyev aprelin 9-da Litvanın Baş naziri İnqa Ruqinieneni qəbul edib.

Görüşdə Azərbaycan-Litva əlaqələrinin ikitərəfli gündəliyi ilə yanaşı, beynəlxalq təşkilatlar çərçivəsində əməkdaşlıq məsələlərinə toxunulub. Bu xüsusda Litvanın Azərbaycanın Avropa İttifaqı ilə münasibətlərinin inkişafına həmişə dəstək verdiyi vurğulanıb.

Bu kontekstdə Milli Məclisin deputatı Elnarə Akimova Patrul.az-a iki ölkə arasında münasibətlərin inkişaf dinamikası barədə şərh edib.

Onun sözlərinə görə, Litva ilə Azərbaycan arasında münasibətlər son illərdə sakit, lakin ardıcıl şəkildə inkişaf edən, qarşılıqlı hörmət və praqmatik əməkdaşlıq üzərində qurulan bir xətt üzrə irəliləyir:

“Bu əlaqələr Avropa ilə Cənubi Qafqaz arasında körpü rolunu oynayan iki dövlətin strateji baxışlarının kəsişdiyi nöqtədə formalaşır.

Hazırda Litva ilə Azərbaycan arasındakı siyasi münasibətlər sabit və konstruktiv kimi qiymətləndirilə bilər. Hər iki ölkə beynəlxalq hüququn prinsiplərinə hörmət, dövlətlərin suverenliyi və ərazi bütövlüyü kimi fundamental məsələlərdə oxşar mövqe nümayiş etdirir. Bu isə münasibətlərin yalnız diplomatik protokol çərçivəsində deyil, dəyər əsaslı platformada inkişaf etdiyini göstərir”.

Millət vəkili qeyd edib ki, İnqa Ruqinienenin Bakıya səfəri və İlham Əliyev ilə görüşü bu münasibətlərin yeni mərhələyə qədəm qoyduğunu nümayiş etdirir:

“Bu cür səfərlər təkcə rəsmi protokol xarakteri daşımır; onlar siyasi iradənin, qarşılıqlı marağın və gələcəyə hesablanmış əməkdaşlıq niyyətinin açıq ifadəsidir. Baş nazirin yüksək qonaqpərvərliyə görə təşəkkür etməsi və tərəfdaşlığın genişləndirilməsi potensialını vurğulaması diplomatik etiketdən daha artıq məna kəsb edir – bu, münasibətlərin dərinləşməsi üçün real zəminin mövcudluğunu göstərir.

Gələcək perspektivlərə baxdıqda isə mənzərə kifayət qədər ümidvericidir. Enerji təhlükəsizliyi, nəqliyyat-logistika dəhlizləri, rəqəmsal inkişaf və təhsil sahələrində əməkdaşlıq üçün geniş imkanlar mövcuddur. Xüsusilə Azərbaycanın Avropanın enerji xəritəsində artan rolu Litva kimi ölkələr üçün strateji əhəmiyyət kəsb edir. Eyni zamanda, Litvanın Avropa İttifaqı daxilindəki təcrübəsi və institusional potensialı Azərbaycan üçün dəyərli əməkdaşlıq platforması yaradır.

Bu münasibətlərin gələcəyini müəyyən edən əsas amillərdən biri də siyasi liderliyin baxışıdır. Prezident İlham Əliyevin balanslaşdırılmış xarici siyasət kursu, müxtəlif geosiyasi qütblər arasında çevik manevr etmə bacarığı və milli maraqları prioritet kimi qorumaq qətiyyəti Azərbaycanın beynəlxalq tərəfdaşlıq şəbəkəsini genişləndirir. Bu kontekstdə Litva ilə əlaqələrin inkişafı da təsadüfi deyil, düşünülmüş və strateji yanaşmanın nəticəsidir”.

“Bütün bunları nəzərə alaraq demək olar ki, Litva-Azərbaycan münasibətləri artıq formalaşmış, etibarlı təməl üzərində dayanan və gələcəkdə daha genişmiqyaslı əməkdaşlığa çevrilə biləcək bir tərəfdaşlıq modelidir. Bu münasibətlərdə emosional tondan çox rasional yanaşma üstünlük təşkil etsə də, qarşılıqlı hörmət və siyasi etimad bu əməkdaşlığa xüsusi dəyər qatır”,– deyə o əlavə edib.

Ləman Sərraf