Cizgi filmləri uşaqlar üçün sadəcə əyləncə vasitəsi deyil, onların düşüncə tərzini, davranışını və duyğularını formalaşdıran bir təsir gücünə malikdir. Lakin hər cizgi filmi uşağın inkişafına müsbət təsir göstərmir.

Patrul.az-ın araşdırmasına görə,bəzi filmlərdə aqressiya, qorxu, yalan və həddindən artıq rəqabət kimi davranışların normallaşdırılması uşaqların reallıq anlayışını çaşdıra bilər. Uşaq qəhrəmanın zorakılıqla qalib gəldiyini görəndə, bunu doğru yol kimi qəbul edə bilir.

Həmçinin, çox rəngli və sürətli səhnələrə malik cizgi filmləri uşaqlarda diqqət dağınıqlığı və əsəbilik yarada bilər. Süjetin sürətli dəyişməsi onların beynini davamlı stimul altında saxlayır və sakit fəaliyyətlərə marağı azaldır.

Digər bir təhlükə isə emosional təsirdir. Bəzi cizgi filmlərində valideyn itkisi, qorxu və ya tənhalıq səhnələri uşağın daxilində travmatik hislər oyadır.

Cizgi filmləri uşaqların inkişafında güclü vasitədir, amma doğru seçim edilmədikdə, zərərli təsirə çevrilə bilər. Valideynlər filmləri əvvəlcə özləri izləməli, sonra uşağa təqdim etməlidir. Axı, hər parlaq rəngin arxasında müsbət mesaj gizlənmir.