Kremlin mətbuat katibi Dmitri Peskov, Rusiya Prezidenti Vladimir Putinin 9 May Qələbə Günü münasibətilə elan etdiyi atəşkəs təşəbbüsü ilə bağlı yeni detalları açıqlayıb.

Patrul.az xəbər verir ki, Peskov bildirib ki, 9 May tarixində atəşkəsin elan edilməsi üçün rəsmi Kiyevin cavabı və ya reaksiyası tələb olunmur.

Onun sözlərinə görə, bu, Vladimir Putinin şəxsi qərarıdır və mütləq şəkildə həyata keçiriləcək.

Bununla belə, Peskov Ukrayna Prezidenti Volodimir Zelenskinin bu addıma reaksiya verməsinin “məntiqli” olacağını, lakin hələlik Kiyevdən heç bir adekvat niyyət görmədiklərini vurğulayıb.

Volodimir Zelenski isə bu məsələyə reaksiya verərək Rusiyanın atəşkəs təklifinin real mahiyyətini anlamaq üçün ABŞ-dən detallı izahat istəyib.

Zelenski qeyd edib ki, bu addımın sadəcə “Moskvadakı parad üçün bir neçə saatlıq təhlükəsizlik” təminatı, yoxsa ciddi sülh təşəbbüsü olduğu dəqiqləşdirilməlidir. Ukrayna lideri qısamüddətli fasilələr deyil, təhlükəsizlik zəmanətləri olan uzunmüddətli sülhün tərəfdarı olduqlarını xatırladıb.

Xatırladaq ki, Vladimir Putin 9 May atəşkəsi ideyasını ötən gün ABŞ Prezidenti Donald Trampla telefon danışığı zamanı səsləndirib. Hazırda atəşkəsin dəqiq başlama və bitmə saatları Rusiya Prezidenti tərəfindən müəyyən edilməyib.

Məlumat üçün bildirək ki, Rusiya və Ukrayna arasında genişmiqyaslı sülh danışıqları dayansa da, tərəflər humanitar məsələlər – əsir mübadiləsi və həlak olan hərbçilərin cəsədlərinin qaytarılması üzrə təmasları davam etdirirlər.

Qeyd edək ki, 9 may 2026-cı ildə Moskvada keçiriləcək Qələbə paradı son 20 ildə ilk dəfə olaraq ağır hərbi texnika olmadan, yalnız hərbi aviasiyanın iştirakı ilə baş tutacaq.