ABŞ Prezidenti Donald Tramp Ceffri Epşteynlə əlaqəsinin olması ilə bağlı yayılan iddialara münasibət bildirib.

Patrul.az-ın xarici KİV-ə istinadən verdiyi məlumata görə, Tramp Epşteynlə hər hansı əlaqəsinin olmadığını vurğulayaraq, “tam şəkildə bəraət aldığını” və “gizlədəcək heç nəyi olmadığını” deyib.

“Gizlədəcəyim heç nə yoxdur. Mən bəraət almışam. Mənim Jeffrey Epstein ilə heç bir əlaqəm yoxdur. Onlar nəsə tapmaq ümidi ilə gəldilər, amma əksini tapdılar. Mən tam şəkildə bəraət qazandım”, – deyə Tramp bildirib.

Prezident jurnalistlərə açıqlamasında araşdırmaların onun barəsində hər hansı qanun pozuntusu üzə çıxarmadığını qeyd edib:

“Demokratlar bunu tapacaqlarına ümid edərək ora getdilər, amma tam əks nəticə əldə etdilər”.

Tramp həmçinin iddia edib ki, Epşteyn onun siyasi fəaliyyətinə mane olmağa çalışıb:

“Ceffri Epşteyn mənim seçilməməyim üçün hansısa müəlliflə, yəni fırıldaqçı ilə mübarizə aparırdı”.

Trampın Epşteynlə keçmişdə əlaqəsi olması ilə bağlı iddialar ABŞ Ədliyyə Nazirliyinin açıqladığı sənədlərdə müstəntiqlərin keçmiş münasibətlərə istinad etməsindən sonra gündəmə gəlib.

Qeyd edək ki, Ceffri Epşteyn 2019-cu ildə cinsi istismar ittihamları ilə bağlı məhkəmə prosesini gözləyərkən federal həbsxanada ölü tapılıb. Onun siyasət, biznes və əyləncə sahələrində tanınmış şəxslərlə əlaqələri uzun müddətdir ictimaiyyətin diqqət mərkəzindədir və araşdırma mövzusu olaraq qalır.