Onlayn alış-veriş artıq həyatımızın ayrılmaz hissəsinə çevrilib. Evdən çıxmadan bir kliklə istədiyimizi almaq çox rahatdır, amma bu rahatlığın arxasında aldadılmaq, keyfiyyətsiz məhsul və təhlükəli sayt riski də var.

Patrul.az onlayn alış-veriş zamanı diqqət etməli olduğumuz məqamları təqdim edir:

Əvvəlcə diqqət ediləcək ən vacib məsələ saytın etibarlılığıdır. Tanımadığınız və şübhəli görünən səhifələrə kart məlumatlarını daxil etməyin. Ünvanın “https” ilə başlamasına və real əlaqə məlumatlarının olmasına baxın.

İkinci məsələ – satıcı və məhsul rəyləridir. Rəyləri oxumaq bəzən məhsulun təsvirindən daha çox məlumat verir. Eyni zamanda, şübhəli dərəcədə ucuz təkliflərə aldanmayın – çox vaxt bu, saxta məhsul və ya dələduzluq əlamətidir.

Çatdırılma və geri qaytarma şərtlərini oxumaq da vacibdir. Bəzi mağazalar məhsulu qəbul etdikdən sonra geri qaytarmağa icazə vermir. Alış-veriş etməzdən əvvəl bu qaydaları dəqiqləşdirmək sizi sonradan əsəbdən qoruyar.

Onlayn alış-veriş vaxt və rahatlıq qazandırır, amma diqqətsizlik baha başa gələ bilər. Ən yaxşı müdafiə məlumatlı olmaqdır. Unutmayın ki, internetdə hər “endirim” fürsət deyil, bəzən tələyə çevrilir.

Ləman Sərraf