Yay ayları yaxınlaşdıqca çoxumuzu düşündürən, gecələr yuxumuzu haram qatan əsas məsələlərdən biri yenidən gündəmə gəlir: Ağcaqanadlar niyə bəzi insanları hədəf seçir, bəzilərinə isə toxunmur?

Patrul.az-ın apardığı araşdırmalara görə, ağcaqanadların insan seçimi tamamilə elmi faktorlara əsaslanır və təsadüfi deyil.

Ağcaqanadlar qurbanlarını seçərkən vizual və kimyəvi siqnallardan istifadə edirlər. Araşdırmalar göstərir ki, aşağıdakı xüsusiyyətlərə malik insanlar onlar üçün əsl “maqnit” rolunu oynayır:

I Qan Qrupu (0): Araşdırmalara görə, I qan qrupuna sahib olan insanlar ağcaqanadlar üçün II qrup (A) insanlara nisbətən demək olar ki, iki dəfə daha cəlbedicidir.

Tər və Süd Turşusu: Bədən temperaturu yüksək olan və idmandan sonra bədənində süd turşusu (laktat) toplanan insanlar, həmçinin tərli dəri ağcaqanadların ən sevdiyi “menyudur”.

Dəri Bakteriyaları: Hər kəsin dərisində özünəməxsus mikrobiom (bakteriya örtüyü) var. Bəzi spesifik dəri bakteriyaları ağcaqanadları cəlb edən xüsusi qoxular yaradır.

Tünd Rəngli Geyimlər: Ağcaqanadlar yalnız qoxuya deyil, vizual amillərə də baxırlar. Qara, tünd göy və qırmızı kimi rənglər onların diqqətini daha tez çəkir.

Yeyib-itdiklərimiz də bu prosesə birbaşa təsir edir:

Alkoqol və Pivə: Cəmi bir şüşə pivə qəbulu belə dərinin kimyəvi tərkibini dəyişərək ağcaqanadları dərhal sizə tərəf yönəldə bilər.

Duzlu və Potasiumla Zəngin Qidalar: Çox duzlu qidalar və banan kimi potasiumlu meyvələr bədəndən ayrılan süd turşusunun miqdarını artırır.

Ağcaqanad dişləməsi sadəcə “şirin qan” anlayışı ilə bağlı deyil. Bu, tamamilə genetikamız, qan qrupumuz, maddələr mübadiləmiz və ifraz etdiyimiz kimyəvi qoxuların bütövlüyüdür. Yay aylarında bu kabusdan qorunmaq üçün tünd rəngli geyimlərdən qaçınmaq, idmandan dərhal sonra duş almaq və bədən istiliyini normada saxlamaq ən effektiv preventiv addımlardır.

Cəmilə Cəfərzadə