Ətrafımızda daim gülərüz görünən insanların hər zaman xoşbəxt olduğu düşünülür. Ancaq psixoloqlar bildirirlər ki, bəzi insanlar üçün gülüş sadəcə sevinc ifadəsi deyil, daxildə yaşadıqları emosional ağrını gizlətmək üsulu da ola bilər.

Patrul.az-ın araşdırmalarına görə, psixoloji tədqiqatlar göstərir ki, insanlar bəzən stres, kədər və ya fiziki ağrı hiss etdikləri anlarda belə gülümsəyə bilirlər. Mütəxəssislər bunu sosial münasibətləri qorumaq, ətrafdakıları narahat etməmək və emosiyalarını idarə etmək cəhdi ilə əlaqələndirirlər.

Araşdırmalarda qeyd olunur ki, zarafat etməyi və başqalarını güldürməyi sevən insanların bir qismi öz daxili narahatlıqlarını bu yolla gizlətməyə çalışır. Bununla belə, mütəxəssislər vurğulayırlar ki, çox gülmək və ya gülərüz olmaq insanın mütləq psixoloji problem yaşadığı anlamına gəlmir.Bu davranışın səbəbi hər bir insanda fərqli ola bilər.

Psixoloqlar bildirirlər ki, uzun müddət hisslərini gizlətmək emosional yorğunluğa səbəb ola bilər. Buna görə də insanlar çətinliklərini etibar etdikləri şəxslərlə bölüşməli, ehtiyac olduqda isə peşəkar psixoloji dəstəyə müraciət etməlidirlər.

Elm göstərir ki, gülüş hər zaman xoşbəxtliyin göstəricisi deyil. Bəzən ən çox gülən insanlar da daxildə çətin hisslərlə mübarizə apara bilirlər. Buna görə də insanların yalnız zahiri davranışına deyil, emosional vəziyyətinə də diqqət yetirmək vacibdir.

Cəmilə Cəfərzadə