Çinin Şandonq əyalətinin Veifanq şəhərində dünyanın ilk mərkəzi oxu olmayan dönmə çarxı istifadəyə verilib. Hündürlüyü 145 metr olan bu qurğu müasir mühəndisliyin və memarlığın ən diqqətçəkən nümunələrindən biri kimi dəyərləndirilir.

Patrul.az xarici mediaya istinadən xəbər verir ki, dönmə çarxı Belanq çayı üzərində yerləşən körpünün konstruksiyasına birləşdirilib. Ənənəvi dönmə çarxlarından fərqli olaraq burada mərkəzi ox və ya klassik dayaqlar mövcud deyil. Fırlanma prosesi iri metal halqa və onun üzərində hərəkət edən kabinlər vasitəsilə təmin olunur.

Qurğunun diametri 125 metrdir. Üzərində 36 sərnişin kabini yerləşdirilib və hər kabin 8–10 nəfər tutumuna malikdir. Kabinlərdə havalandırma sistemi, işıqlandırma və ekranlar quraşdırılıb. Mexanizm səssiz və sabit hərəkət edən xüsusi konstruksiya ilə işləyir.

Layihə üzərində çalışan mühəndislər bildirirlər ki, bu tip oxsuz quruluş dünyada ilk dəfədir tətbiq olunur. Konstruksiya həm davamlılığı ilə seçilir, həm də gələcək üslubu xatırladan görünüş yaradır. Tikinti zamanı yüksək möhkəmlikdə polad və digər xüsusi materiallardan istifadə olunub.

Veifanq şəhərinin yerli idarəetmə orqanları dönmə çarxının bölgənin turizm imkanlarını genişləndirəcəyini açıqlayıb. Artıq qurğu şəhərin yeni simvolu kimi təqdim olunur və çox sayda ziyarətçinin marağına səbəb olur.