Patrul.az media şirkətinin rəhbəri Səməndər Niftəliyev yazır:

Redaksiyamıza daxil olan videogörüntülər Azərbaycan təhsil sistemi üçün son dərəcə ciddi və narahatedici mənzərəni ortaya qoyur. İddialara görə, Qobustan rayonunun Ərəbşahverdi kənd ümumi orta məktəbində müəllim Emin Paşayev məktəbin direktoruna qarşı fiziki zorakılıq göstərərək onun yaxasından yapışıb divara vurub. Bununla yanaşı, hadisə zamanı digər müəllimlərə qarşı da açıq şəkildə təhqiramiz ifadələr işlədildiyi, onların şərəf və ləyaqətinin alçaldıldığı bildirilir.

Məsələnin ən ağır tərəfi isə ondan ibarətdir ki, bu hadisə məktəb mühitində, şagirdlərin gözü önündə baş verib. Təhsil ocağı olması gərəkən bir məkanda zorakılıq, aqressiya və hörmətsizliyin nümayiş etdirilməsi təkcə konkret şəxslərin davranışı deyil, bütövlükdə cəmiyyət üçün təhlükəli presedentdir. Məktəb uşaqlar üçün tərbiyə, mənəvi dəyərlər və nümunə məkanı olmalıdır. Burada baş verən hər bir neqativ davranış birbaşa şagirdlərin psixologiyasına, dünyagörüşünə və gələcək davranış modellərinə təsir edir.

Müəllim adı daşıyan şəxsin bu cür davranışı nə peşə etikası ilə, nə pedaqoji dəyərlərlə, nə də insanlıq anlayışı ilə uzlaşır. Mübahisə, narazılıq və ya fikir ayrılığı hansı səbəbdən yaranmasından asılı olmayaraq, onu zorakılıq yolu ilə “həll etməyə” cəhd göstərmək qəbuledilməzdir. Xüsusilə də bu hallar uşaqların qarşısında baş verirsə, vəziyyət daha da ağırlaşır. Bu cür görüntülər məktəbdə müəllim nüfuzunu sarsıdır, təhsil müəssisəsini isə təhlükəsiz mühit statusundan məhrum edir.

Digər tərəfdən, direktor məktəbdə idarəetmə və nizam-intizamı təmin edən əsas fiqurdur. Direktorun açıq şəkildə təzyiqə və fiziki hücuma məruz qalması məktəbdə idarəetmə böhranının və ciddi nəzarətsizliyin mövcudluğuna işarə edir. Bu isə bir sıra suallar yaradır: məktəbdə daxili münasibətlər niyə bu həddə çatıb? Problemlər niyə rəsmi, hüquqi və etik yollarla deyil, zorakılıqla “həll olunur”?

Hazırda hadisənin bütün detalları ilə bağlı rəsmi və tam məlumat olmasa da, yayılan videogörüntülər məsələyə biganə qalmağın mümkünsüz olduğunu göstərir. Təhsil Nazirliyi, yerli təhsil idarələri və hüquq-mühafizə orqanları bu məsələyə dərhal və prinsipial mövqe ortaya qoymalıdır. Əgər iddialar təsdiqini taparsa, hadisədə günahı olan şəxslər qanun qarşısında cavab verməli və məktəblərdə zorakılığa heç bir halda yol verilmədiyi açıq şəkildə nümayiş etdirilməlidir.

Patrul.az olaraq bildiririk ki, məsələnin bütün detallarını araşdıracaq, rəsmi qurumların mövqeyini və hadisə ilə bağlı veriləcək qərarları izləyərək ictimaiyyətə təqdim edəcəyik. Təhsil ocaqlarında zorakılıq və hörmətsizlik halları nə qədər tez və qətiyyətlə cəzalandırılsa, bir o qədər tez sağlam, təhlükəsiz və nümunəvi təhsil mühitinin formalaşmasına nail olmaq mümkün olacaq.

Patrul.az olaraq qarşı tərəflərin mövqeyini işıqlandırmağa hazırıq.