Patrul.az xəbər verir ki, İran rəsmiləri ABŞ ilə nəzərdə tutulan danışıqların davam etdirilməsi üçün İsrailin Livan ərazisində həyata keçirdiyi hərbi əməliyyatların dayandırılmasını tələb ediblər.

Məlumata görə, Tehran Livandakı vəziyyətin ABŞ-İran münasibətlərinin gələcəyinə birbaşa təsir etdiyini hesab edir. İran tərəfi bildirib ki, İsrailin Livana endirdiyi zərbələrin davam etməsi danışıqlar prosesinə mənfi təsir göstərir və bu şəraitdə yeni görüşlərin keçirilməsi mümkün deyil.

İran rəsmiləri İsrailin Livan ərazisindən çıxmasını və hərbi əməliyyatların tam dayandırılmasını əsas şərtlərdən biri kimi irəli sürüblər. Tehran hesab edir ki, bölgədə davam edən hərbi gərginlik diplomatik proseslərin irəliləməsinə mane olur.

Bu arada İsrail ordusunun Livanın cənubunda həyata keçirdiyi əməliyyatlar nəticəsində ölən və yaralananların olduğu bildirilir. Məhz bu gərginlik səbəbindən ABŞ və İran nümayəndələri arasında İsveçrədə keçirilməsi planlaşdırılan görüşlərin təxirə salındığı qeyd olunur.

Analitiklər hesab edirlər ki, Livandakı vəziyyət yaxın günlərdə normallaşmasa, Vaşinqton və Tehran arasında davam edən diplomatik proses ciddi çətinliklərlə üzləşə bilər.