Leyla Əliyevanın təşəbbüsü ilə növbəti qurban payları ailələrə çatdırılıb.

Patrulaz.az “Oxu.az”a istinadən xəbər verir ki, Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə Qurban bayramı münasibətilə aztəminatlı ailələrin dəstəklənməsi məqsədilə həyata keçirilən “Bizim Mətbəx” sosial layihəsi çərçivəsində xeyriyyə aksiyası davam edir.

Aksiyanın növbəti mərhələsi Bakı şəhərinin Nərimanov rayonunda baş tutub. Bayram münasibətilə bu rayonda yaşayan 100 aztəminatlı ailəyə qurban ətindən ibarət qida bağlamaları təqdim olunub.

“Bizim Mətbəx” layihəsinin əsas məqsədi ehtiyacı olan ailələrə isti yeməklər və ərzaq yardımı çatdırmaqla həmrəylik və paylaşma dəyərlərini gücləndirməkdir. Layihənin fəaliyyətə başladığı gündən bəri Bakı və ətraf ərazilərdə minlərlə insana dəstək göstərilib, onlara gündəlik həyatlarında ümid və diqqət bəxş edilib.

Qeyd edək ki, artıq layihənin rəsmi veb-saytı – bizimmetbex.az – fəaliyyətə başlayıb. Sayt vasitəsilə vətəndaşlar ianə edə və könüllü fəaliyyətə qoşula bilərlər.