Günəşdə baş verən alovlanmalar və plazma axınları kimi güclü partlayışlar Yerə çatanda atmosferin maqnit sahəsini pozur və bu hadisə “maqnit qasırğası” adlanır.

Bəs maqnit qasırğası zamanı insan niyə özünü narahat hiss edir?

Patrul.az-ın araşdırmasına görə, Yer kürəsinin ətrafındakı maqnitosfer bu təsir altında dalğalanmağa başlayır və bu dəyişiklik təkcə texnologiyaya deyil, həm də birbaşa insan orqanizminə təsir göstərir. Çünki insan bədəni də öz elektromaqnit sahəsinə malikdir: beynin göndərdiyi elektrik siqnalları, ürəyin ritmik impulsları, damarların gərginlik səviyyəsi – hamısı bu sahənin bir hissəsidir. Yerin maqnit sahəsi dəyişəndə bizim daxili “bioloji ritmimiz” də müvəqqəti uyğunsuzluq yaşayır.

Nəticədə bir çox insan səbəbsiz baş ağrısı, yorğunluq, əsəbilik, diqqət dağınıqlığı, yuxu pozuntusu, ürək döyüntüsünün artması, təzyiqin qalxıb-enməsi kimi şikayətlər hiss edir. Xüsusilə meteohəssas insanlar, yaşlılar, ürək-damar problemi olanlar və hamilələr bu dəyişikliklərə daha sərt reaksiya verirlər. Bunun əsas səbəbi maqnit qasırğası zamanı havada ionlaşmanın artması, sinir sisteminin həssaslaşması və damarların genişlənib-daralma ritminin pozulmasıdır. Hətta bəzən psixoloji faktor da bunda rol oynayır: insanlar qasırğa olduğunu biləndə özlərini daha gərgin hiss edirlər.

Bu dövrdə bədən sadəcə bir az daha həssas olur. Ona görə də yüngül gəzinti etmək, bol su içmək, ekran qarşısında çox qalmamaq, kofeini azaltmaq və günü mümkün qədər sakit tempdə keçirmək narahatlığı xeyli yüngülləşdirir. Maqnit qasırğası mistik və qorxulu bir proses deyil, sadəcə bədənin kosmosla kiçik bir “ahəng dəyişməsidir”. Bir sözlə, hava dalğalananda insan da bir az dalğalanır. Bu təbiidir və narahatlıq keçicidir.

Ləman Sərraf