Son aylarda Azərbaycanda iri market şəbəkələrinin “super endirim”, “şok qiymət”, “yalnız bu gün” kimi elanlarla müştərini cəlb etməsi geniş müzakirə mövzusuna çevrilib.

Bəs bu endirimlər həqiqətən cibimizi yüngülləşdirmək üçündür, yoxsa sadəcə reklam strategiyası?

Patrul.az-ın araşdırmasına görə, bir çox istehlakçı son dövrlər eyni taktikaya rast gəlir: məhsulun əvvəlki qiyməti süni şəkildə şişirdilir, sonra “endirim” adı ilə satışa çıxarılır. Məsələn, 10 manatlıq məhsul bir neçə günlüyə 14 manat göstərilir, daha sonra “10%-lik endirimlə” 12 manata təklif edilir. Bu zaman alıcı real endirim aldığına inanır, amma əslində məhsulu yenə bahalı qiymətə almış olur.

Bəzi marketlərdə isə vitrində endirimli qiymət göstərilsə də, kassada məhsul əvvəlki qiymətlə keçə bilir. Bu hal həm çaşdırır, həm də müştəridə etimadsızlıq yaradır. Ən maraqlısı isə odur ki, alıcılar çox vaxt bunu yalnız qəbzi yoxlayanda anlayırlar.

Əlbəttə, bütün endirimlər saxta deyil. Həqiqətən stokdan çıxarılan, son istifadə tarixi yaxınlaşan və ya mövsümi məhsullarda real endirimlər tətbiq olunur. Problem ondadır ki, bu real endirimlərlə manipulyativ endirimlər qarışdığı üçün müştəri onları ayırd etməkdə çətinlik çəkir.

Bəs istehlakçılar nə etməlidir?

Uzunmüddətli alış-veriş edənlər yaxşı bilirlər ki, məhsulların əvvəlki qiymətini yadda saxlamaq çox şeyi həll edir. Üstəlik, real endirimlər adətən marketin çox reklam etmədiyi, sadəcə tətbiq etdiyi endirimlərdə olur. Səs-küylü elanlar isə çox vaxt marketin öz maraqlarını qorumağa hesablanır.

Beləliklə, marketlərdə endirim məsələsinə tənqidi yanaşmaq, qiymətləri müqayisə etmək və emosional qərar verməmək ən düzgün addımdır. “Endirim” sözünün cazibəsinə qapılmadan, qiymətin həqiqətən dəyişib-dəyişmədiyini yoxlamaq daha məqsədəuyğundur.

Ləman Sərraf