Xaçmaz şəhərində 1 nömrəli məktəbin yaxınlığında açıq vəziyyətdə qalan elektrik naqilləri ilə bağlı təhlükəli vəziyyət aradan qaldırılıb.

Patrul.az xəbər verir ki, bununla bağlı “Azərişıq” ASC redaksiyamızın sorğusuna cavab verib.

Bildirilib ki, 1 nömrəli məktəbin arxa hissəsində açıq vəziyyətdə olan naqillər səliqəyə salınıb, elektrik paylayıcı qurğular isə “Azərişıq” ASC-nin texniki təhlükəsizlik tələblərinə uyğun şəkildə bərpa edilərək təhlükəsiz vəziyyətə gətirilib.

Qeyd edək ki, bundan əvvəl ərazidə elektrik naqillərinin açıq qalması sakinlərin narahatlığına səbəb olurdu. Xüsusilə məktəbə yaxın ərazi olduğundan burada hərəkət edən uşaqlar üçün təhlükə yarandığı bildirilirdi.

Hazırda görülən tədbirlər nəticəsində ərazidəki təhlükəli vəziyyət aradan qaldırılıb.

­Gülbəniz Səfərova