“Müctəba Xamenei zədələrə baxmayaraq, tam sağlamdır”.

Patrul.az “Fars Xəbər Agentliyi”nə istinadən xəbər verir ki, bunu İranın ali rəhbərinin beynəlxalq məsələlər üzrə müavini Məhəmməd Hüseyni Qumi bildirib.

İran rəsmisi bəzi dairələrdə ali rəhbərin ictimaiyyət qarşısında görünməməsi və ya audio-video mesajlar yaymaması ilə bağlı yayılan iddialara münasibət bildirib.

Rəsmi qeyd edib ki, bu cür suallar “hədəflənmiş eyhamlarla uyğun gəlir” və hazırkı şəraitdə əsas prioritet onun təhlükəsizliyinin təmin olunmasıdır.

Qumi Müctəba Xameneinin bombalanan binada olduğunu, lakin sonda xilas edildiyini təsdiqləyib. Onun sözlərinə görə, Xameneinin partlayış zamanı həyətdə olması onun sağ qalmasına səbəb olub:

“O, bombalanan və başqalarının şəhid olduğu həmin binada idi. Partlayışdan bir neçə dəqiqə əvvəl, Allahın izni ilə həyətə çıxmışdı. Allah onun sağ qalmasını istədi. Hazırda bizim üçün ən vacib məsələ yer üzündə Allahın sübutu olan Həzrət Rəhbərin həyatını qorumaqdır. Sizi əmin edirəm ki, orada aldığı xəsarətlərə baxmayaraq, Uca Tanrı onu şiələr üçün bir xəzinə kimi qoruyub saxlayıb”, – deyə o bildirib.

Rəsmi şəxs əlavə edib ki, ali lider fiziki cəhətdən “tam sağlamdır” və ölkənin idarə olunması prosesi fasiləsiz şəkildə davam edir:

“Hazırda o, tam sağlamdır və işləri fəal şəkildə idarə edir. O, birbaşa rəhbərliyi altında danışıqlar və sahə əməliyyatları ilə bağlı məsələlərə nəzarət edir. Bu yaxınlarda o, hətta danışıqlar qrupuna müxtəlif şərtlər altında hansı tədbirlərin görülməsi ilə bağlı konkret təlimatlar verib. Vəziyyətə tam nəzarət onun əlindədir”, – deyə İran rəsmisi əlavə edib.

Xatırladaq ki, Müctəba Xamenei 8 mart 2026-cı ildə atasının vəfatından sonra İranın 3-cü Ali Lideri vəzifəsinə başlayıb.