“Rusiya, İran və Azərbaycandan qaza ehtiyacımız var”.

Patrul.az Türkiyə KİV-nə istinadla xəbər verir ki, bu sözləri Türkiyənin energetika naziri Alparslan Bayrakdar ölkənin enerji təchizatı ilə bağlı açıqlamasında deyib.

Nazir bildirib ki, Rusiya uzun illərdir Türkiyə üçün “etibarlı qaz təchizatçısı”dır və ölkənin bütün bölgələrində istifadə olunan qaz 1980-ci illərdən bəri Rusiyadan idxal olunur.

Bayrakdar vurğulayıb ki, Türkiyə qaz tədarükündə yalnız Rusiyaya deyil, həmçinin İran və Azərbaycana da ehtiyac duyur. Onun sözlərinə görə, ölkənin əsas məqsədi daxili bazarı ucuz, rəqabətədavamlı və etibarlı qazla təmin etməkdir.

“Rusiya, İran və Azərbaycandan qaza ehtiyacımız var. Eyni zamanda qaz Türkiyəyə LNG vasitəsilə başqa mənbələrdən də gələcək. Biz Rusiya ilə danışıqlarımızı davam etdiririk və inanırıq ki, onların müqavilələri yekunlaşdırılıb. Gələn il də Qazprom tərəfindən tədarük olunmağa davam ediləcək. Biz isə daha çox qısamüddətli müqavilələrin uzadılmasına və ya yenilənməsinə diqqət yetiririk. Bu müqavilələr adətən bir il və ya təxminən belə bir müddət üçün nəzərdə tutulur”, – deyə Bayrakdar bildirib.