İsti yay günlərində sərinləmək üçün içilən soyuq suyun sağlamlığa təsirləri barədə mübahisələr davam edir.

Patrulaz.az “Times Entertainment”ə əsasən məlumat verir ki, bəzi tədqiqatlar soyuq suyun bədəndə müəyyən narahatlıqlar yarada biləcəyini göstərir. 1978-ci ildə aparılan bir araşdırma nəticəsində məlum olub ki, soyuq su burun yollarındakı mukusun qalınlığını artırır və nəfəs almağı çətinləşdirir.

Əksinə, isti su və ya toyuq şorbası nəfəs yollarını genişləndirərək nəfəsi rahatlaşdırır.

Eyni zamanda, 2001-ci və 2012-ci illərdə aparılmış tədqiqatlar göstərir ki, soyuq su bəzi insanlarda miqren ağrılarını tətikləyə, həzm sistemi pozuntusu olanlarda isə simptomları ağırlaşdıra bilər.

Digər tərəfdən, sağlamlıq mütəxəssisləri qeyd edirlər ki, sağlam insanlar üçün soyuq su xüsusilə fiziki aktivlik zamanı faydalı ola bilər. 2012-ci ildə aparılan araşdırma göstərib ki, soyuq su bədən temperaturunu tənzimləyərək fiziki performansı artırır və istidən yaranan yorğunluğu azaldır.

Su arıqlamağa kömək edirmi?

Bəzi məlumatlara görə, soyuq su içmək metabolizmi cüzi şəkildə sürətləndirə, həmçinin şəkərli içkiləri əvəz edərək kalori qəbulunu azaltmağa kömək edə bilər. Bunlardan birincisi, su kalori qəbulunu azaldır. Su içmək, xüsusilə də şəkərli içkilər əvəzinə seçildikdə, gündəlik kalori qəbulunu azaldır. Məsələn, bir stəkan qazlı içkidə 140–150 kalori ola bilər, halbuki su sıfır kalorilidir. Beləliklə, təkcə içki seçimində dəyişiklik edərək bədənə artıq enerji yüklənməsinin qarşısını almaq mümkündür.

İkincisi isə, su iştahanı azalda bilər. Tədqiqatlara görə, yeməkdən 30 dəqiqə əvvəl içilən bir stəkan su, bəzi insanlarda toxluq hissi yaradaraq porsiyanın azalmasına səbəb olur. Bu isə dolayısı ilə gündəlik qida qəbulunun azalması və çəki itkisi ilə nəticələnə bilər.

Üçüncüsü, metabolizmi az da olsa sürətləndirir. Soyuq su içmək bədəni onu daxili temperaturuna çatdırmaq üçün enerji sərf etməyə vadar edir. Bu proses zamanı az miqdarda əlavə kalori yandırılır. Bu təsir böyük olmasa da, davamlılıq və ümumi həyat tərzi ilə birləşdikdə effekt verir.

Dördüncüsü, idman zamanı performansı artırır. Kifayət qədər maye qəbul etmək məşq zamanı əzələlərin daha effektiv işləməsinə səbəb olur. Nəmlənmiş bədən daha dözümlü olur və bu da idman zamanı daha çox kalori yandırmaq imkanı yaradır.

Qeyd edək ki, suyun temperaturundan asılı olmayaraq, əsas məsələ bədənin kifayət qədər nəmləndirilməsidir. İstər ilıq, istərsə də soyuq suyun sağlamlığa müsbət təsiri onun miqdarına və davamlı qəbuluna bağlıdır.

Gülbəniz Səfərova