Yeni Android smartfon alanların əksəriyyəti cihazı işə saldıqdan sonra Wi-Fi şəbəkəsinə qoşulur, Google hesabını əlavə edir və sistem yeniləmələrini quraşdırmaqla kifayətlənir. Halbuki mütəxəssislər bildirirlər ki, telefonun daha sürətli, təhlükəsiz və rahat işləməsi üçün ilk gündən bəzi vacib ayarların dəyişdirilməsi tövsiyə olunur. Sadə görünən bu addımlar həm istifadə təcrübəsini yaxşılaşdıra, həm də şəxsi məlumatların qorunmasına kömək edə bilər.

Patrul.az-ın araşdırmasına görə, ekspertlərin diqqət çəkdiyi ilk məqam adaptiv parlaqlıq funksiyası ilə bağlıdır. Bir çox Android cihazında standart olaraq aktiv olan bu sistem ekranın işıq səviyyəsini ətraf mühitə uyğun avtomatik tənzimləyir. Nəzəri olaraq bu, həm enerji sərfiyyatını azaltmalı, həm də istifadəçiyə rahatlıq yaratmalıdır. Lakin praktikada ekranın bəzən həddindən artıq parlaq, bəzən isə kifayət qədər işıqlı olmaması narazılıq yaradır. Buna görə mütəxəssislər adaptiv parlaqlığı söndürərək ekranın işıq səviyyəsini əl ilə tənzimləməyi daha məqsədəuyğun hesab edirlər.

Diqqət yetirilməli digər məqam ekranın avtomatik sönmə vaxtıdır. Əksər telefonlarda ekran təxminən 30 saniyə istifadə olunmadıqda sönür. Bu isə məqalə oxuyarkən, sənədlərə baxarkən və ya videoya tamaşa edərkən istifadəçini narahat edə bilər. Mütəxəssislər ekranın sönmə müddətini ən azı 1-2 dəqiqəyə qədər artırmağın daha rahat istifadə imkanı yaratdığını bildirirlər.

Yeni telefonlarda təhlükəsizlik məsələsi də xüsusi əhəmiyyət daşıyır. Bu baxımdan tətbiqlərin sabitlənməsi funksiyası diqqət çəkir. Telefonu qısa müddətə başqa bir şəxsə verməli olduqda bu funksiya şəxsi məlumatların qorunmasına kömək edir. Aktivləşdirildikdən sonra cihaz yalnız seçilmiş tətbiqi göstərir və istifadəçi digər proqramlara keçə bilmir. Beləliklə, telefon başqasının əlində olsa belə, şəxsi məlumatlara giriş məhdudlaşdırılır.

Mütəxəssislərin tövsiyə etdiyi ən vacib addımlardan biri də SIM kart üçün PIN kodunun aktivləşdirilməsidir. Bir çox insan ekran kilidindən istifadə etsə də, SIM kartın ayrıca qorunmasını nəzərdən qaçırır. Halbuki telefon oğurlandıqda və ya itirildikdə SIM kart başqa cihaza yerləşdirilərək SMS təsdiq kodları və zənglər ələ keçirilə bilər. PIN kodunun aktivləşdirilməsi isə belə halların qarşısını almağa kömək edir və əlavə təhlükəsizlik qatını təmin edir.

Ekspertlər bununla yanaşı, Android istifadəçilərinə “Cihazımı tap” xidmətini aktivləşdirməyi də tövsiyə edirlər. Bu xidmət telefon itirildikdə və ya oğurlandıqda onun yerini müəyyən etməyə, uzaqdan kilidləməyə və ya məlumatları silməyə imkan verir. Həmçinin sürətli ayarlar panelinin şəxsi ehtiyaclara uyğunlaşdırılması və funksional klaviatura tətbiqlərindən istifadə də gündəlik rahatlığı artırır.

Maraqlıdır ki, bəzi müasir smartfonlarda standart olaraq aktiv olan RAM Plus kimi funksiyalar da hər zaman faydalı hesab edilmir. Kifayət qədər operativ yaddaşa malik cihazlarda bu funksiyanın söndürülməsi performansa müsbət təsir göstərə və sistemin daha çevik işləməsinə kömək edə bilər.

Texnologiya mütəxəssislərinin fikrincə, yeni telefonun imkanlarından maksimum yararlanmaq üçün onu yalnız quraşdırmaq kifayət deyil. Bir neçə dəqiqə ərzində edilən düzgün ayarlar həm cihazın təhlükəsizliyini artırır, həm də gündəlik istifadədə daha rahat və məhsuldar təcrübə yaradır. Bu səbəbdən yeni Android smartfon alanların ilk işlərindən biri məhz bu vacib parametrləri nəzərdən keçirmək olmalıdır.

Ləman Sərraf