İlk baxışda adi çay təsiri bağışlayan Qvatemaladakı Motagua çayı əslində dünyanın ən ciddi plastik çirklənməsi problemlərindən birinin nümunəsi hesab olunur.

Patrul.az xarici mediaya istinadən xəbər verir ki, mütəxəssislərin hesablamalarına görə, mövcud tendensiya davam edərsə, 2050-ci ilə qədər dünya okeanlarındakı plastik tullantıların ümumi kütləsi bütün balıqların ümumi kütləsini ötə bilər. Bu isə ekoloqların uzun illərdir xəbərdarlıq etdiyi qlobal ekoloji təhlükənin getdikcə daha da dərinləşdiyini göstərir.

Mərkəzi Amerikanın ən böyük çaylarından biri olan Motagua çayı hər il tonlarla plastik tullantını dənizə daşıyır. Çayın səthində toplanan plastik butulkalar, paketlər və digər məişət tullantıları ekosistemə ciddi zərər vurur, su canlılarının həyatını təhlükə altına qoyur.

Son illərdə birdəfəlik plastik məhsulların istifadəsinin azaldılması istiqamətində müxtəlif təşəbbüslər həyata keçirilsə də, bu tədbirlər problemin həllində gözlənilən effekti verməyib. Məsələn, plastik içmə borularının kağız borularla əvəzlənməsi geniş müzakirə olunsa da, qlobal miqyasda plastik tullantıların həcmi artmaqda davam edir.

Ekoloqlar hesab edirlər ki, problemin həlli yalnız fərdi istehlak vərdişlərinin dəyişdirilməsi ilə mümkün deyil. Bunun üçün tullantıların idarə olunması sistemlərinin təkmilləşdirilməsi, plastik istehsalının azaldılması və beynəlxalq əməkdaşlığın gücləndirilməsi vacibdir.

Mütəxəssislər xəbərdarlıq edirlər ki, əgər plastik çirklənməsinə qarşı daha sərt tədbirlər görülməzsə, gələcək nəsillər okeanlarda və çaylarda daha ciddi ekoloji problemlərlə üzləşə bilərlər.