Astrologiya əsrlər boyu insanları cəlb edən, bəziləri üçün ilham, bəziləri üçün isə həyat bələdçisi olan bir sistemdir. Lakin çoxları onun yalnız səthini tanıyır. Əslində astrologiyanın gizli tərəfləri var ki, bu sahəni daha dərindən başa düşmək üçün onlara nəzər yetirmək vacibdir.

Patrulaz.az olaraq bu sahənin sirlərinə nəzər saldıq:

Astrologiya əslində çox mürəkkəbdir. Ən çox yayılmış və tanınan forma – “bürcün nədir?” sualına əsaslanan Günəş bürcü anlayışıdır. Amma bu, böyük astroloji sistemin cəmi bir parçasıdır. Əslində insanın doğum xəritəsi çox daha geniş məlumat ehtiva edir. Orada Ay bürcü (emosiyalar), Üfüq bürcü – ascendant (insanın xarici görünüşü və cəmiyyətə təqdim etdiyi sima), evlər və planetlərin yerləşməsi kimi elementlər var. Hətta Uran, Neptun və Pluton kimi yavaş hərəkət edən planetlər də kollektiv təsirlər və şəxsi transformasiyalar barədə ipucları verir. Bir sözlə, “Mən Əqrəbəm” deməklə astrologiyanı tam anladığını düşünmək, okeana baxıb “su gördüm” deməyə bənzəyir.

Astrologiya psixoloji güzgü kimidir

Astrologiyanın əsl gücü, bəlkə də gələcəyi “bildirmək” deyil, insanı öz-özünü anlamağa təşviq etməsidir. Psixologiyanın banilərindən biri olan Karl Yung belə, astrologiyanı insan şüurunun simvolik tərəflərini izah etmək üçün istifadə edib. Bürclər və planetlər, əslində, insanın içindəki arxetipləri, yəni universal psixoloji gücləri təmsil edir. Mars döyüşkənlik və ehtirası, Venera isə sevgini və estetik duyumu simvollaşdırır. Bu baxımdan astrologiya bir növ psixoloji hava proqnozudur: Hansı enerjilərin səhnədə olduğunu göstərir, amma sənin nə edəcəyin yenə də öz iradəndən asılıdır.

Astrologiya nə qədər dəqiqdirsə, o qədər fərdidir

Çox vaxt insanlar deyirlər: “Qız bürcüdür, amma heç Qıza oxşamır”. Bu təəccüblü deyil, çünki yalnız günəş bürcünə əsaslanan astrologiya səthidir. Əsl fərdi analiz üçün insanın doğum tarixi ilə yanaşı dəqiq saat və doğulduğu yer də vacibdir. Belə olduqda ortaya unikal doğum xəritəsi çıxır ki, bu da şəxsə məxsus enerjiləri və potensialları daha doğru əks etdirir. Əgər bu xəritə təcrübəli astroloq tərəfindən analiz olunarsa, şablon cümlələrdən çox fərqli və fərdiləşdirilmiş təhlil ortaya çıxır. Amma yenə də bu, onun elmi əsaslı olduğu anlamına gəlmir,  yalnız məntiqi qurulmuş bir simvol sistemidir.

Astrologiyanın elmi əsası yoxdur

Bunu qəbul etmək çoxlarına çətin gələ bilər, amma astrologiya elm deyil. Elmi metod baxımından astrologiya bir neçə əsas meyara cavab vermir:

-Təkrar edilə bilən nəticələr vermir;

-Statistik dəqiqliyi elmi metodlarla təsdiqlənməyib;

-Çox vaxt “doğru çıxdı” dediyimiz analizlər sadəcə Barnum effekti ilə izah olunur, yəni ümumi cümlələrin şəxsi qəbul edilməsi.

Bir sözlə, astrologiyada hiss etdiyimiz “uyğunluq” əksər hallarda bizim onu uyğunlaşdırmağımızla bağlıdır, gerçək bir təsadüf və ya psixoloji yönləndirmə nəticəsidir.

Bəziləri astrologiyanı pul və güc vasitəsinə çevirib

Astrologiyanın bəzən istismar edildiyi də gizli deyil. İnsanların qorxularını və arzularını manipulyasiya etmək, bəzən onlara “ulduzların hökmü” adı altında satılır. Məsələn: “Saturn geri gedir, bu ay yeni işə başlama!”,  “Yupiter bürcünə keçir, bu il zəngin olacaqsan!”…

Bu kimi cümlələr bəzən sadəcə qorxu satmaq və ya həddindən artıq ümid vermək məqsədilə işlədilir. Nəticədə isə insan öz iradəsini bir kənara qoyur və həyatını “ulduzlara təslim edir”. Belə asılılıq isə sağlam düşüncənin və fərdi qərarvermə qabiliyyətinin qarşısını ala bilər.

Astrologiyanın sirri onunla necə davrandığında gizlidir

Əgər astrologiyaya ilham və özünüanlama aləti kimi yanaşırıqsa, o zaman faydalı bir simvol sistemidir. Amma əgər ona kor-koranə inanırıq, həyat qərarlarını bu sistemin dediklərinə görə veririk və iradəmizi ikinci plana atırıqsa – o zaman bu, artıq bizə zərər verən bir inanca çevrilə bilər.

Unutmayın ki, göy üzü ilham verə bilər, amma qərarları verən siz olmalısınız!

Ləman Sərraf