Nepal hökuməti etirazlarda 19 nəfərin ölümündən sonra sosial media qadağasını ləğv edib.

Patrulaz.az xarici KİV-ə istinadən xəbər verir ki, kütləvi etirazlardan sonra Rabitə və İnformasiya Texnologiyaları naziri Prithvi Subba Gurung hökumətin keçən həftə tətbiq etdiyi qadağanın ləğv edildiyini açıqlayıb.

“Biz sosial medianın bağlanmasını geri götürdük. Onlar indi işləyirlər”, – deyə nazir bildirib.

Xatırladaq ki, iyul ayında hökumət onlayn fırıldaqçılıq və çirkli pulların yuyulmasını əsas gətirərək “Telegram” messencerini bloklamışdı.

Sentyabrın əvvəlində isə “Facebook”, “WhatsApp”, “Instagram”, “LinkedIn”, “YouTube” və “X” daxil olmaqla, ümumilikdə 26 sosial media platformasına giriş bağlanmışdı. Rəsmilər bu platformalara qeydiyyat üçün bir həftə vaxt vermiş, tələblərə əməl olunmadığı üçün onların bloklanacağını bildirmişdi.

Lakin bu qadağa ölkədə ciddi narazılıqlarla səbəb olub. Bazar ertəsi minlərlə gənc sosial media qadağasına və korrupsiya iddialarına etiraz etmək üçün küçələrə çıxıb. Etiraz aksiyaları zamanı təhlükəsizlik qüvvələri ilə toqquşmalarda 19 nəfər ölüb, 100-dən çox insan yaralanıb. Polis etirazçılara qarşı canlı atəş açıb, gözyaşardıcı qaz və rezin güllələrdən istifadə edib.

Paytaxt Katmanduda parlament binasına daxil olan nümayişçilər polislə üz-üzə gəldikdən sonra şəhərin bəzi hissələrində komendant saatı elan olunub.