Bəzi ölkələrdə siqaretlə mübarizə sadəcə maarifləndirmə ilə bitmir, qaydaları pozanları real cərimələr gözləyir. 

Patrul.az-ın araşdırmasına görə, son illər ictimai sağlamlığı qorumaq məqsədilə bir sıra dövlətlər siqaret çəkilməsini ciddi şəkildə məhdudlaşdıran qanunlar qəbul edib və bu qaydalar təkcə qapalı məkanlarla kifayətlənmir, bəzən küçələri, parkları, hətta şəxsi avtomobilləri də əhatə edir.

Məsələn, Sinqapur siqaretlə bağlı ən sərt qanunları olan ölkələrdəndir. Burada icazəsiz yerlərdə siqaret çəkənlər yüzlərlə dollar cərimə olunur, təkrar hallarda isə məbləğ daha da artır.

Avstraliyada çimərliklərdə, ictimai dayanacaqlarda və uşaq meydançalarının ətrafında siqaret çəkmək qadağandır və qaydanı pozanlar yüksək məbləğdə cərimə ödəməli olur.

Fransada parklar, məktəb ətrafları və ailələrin sıx olduğu açıq məkanlarda siqaret çəkənlər inzibati məsuliyyət daşıyır, cərimələr isə yüz avroya qədər çata bilər.

İtaliya bəzi şəhərlərdə hamilə qadınların və uşaqların yanında siqaret çəkilməsini qanunla qadağan edib.

Yaponiyada isə maraqlı yanaşma var: bir çox şəhərdə küçədə gəzə-gəzə siqaret çəkmək qadağandır və bu qaydanı pozanlar cərimələnir, siqaret yalnız xüsusi zonalarda icazəlidir.

İspaniya və Kanada kimi ölkələrdə də restoranların açıq terrası, dayanacaqlar və ictimai binaların ətrafında siqaret çəkmək cərimə ilə nəticələnir.

Bu ölkələrin təcrübəsi göstərir ki, sərt qaydalar təkcə siqaret çəkənləri deyil, ümumilikdə cəmiyyəti daha sağlam mühitə yönəltmək məqsədi daşıyır. Dövlətlər açıq mesaj verir: şəxsi seçimlər başqalarının sağlamlığına zərər vurduğu anda artıq ictimai problemə çevrilir.

Ləman Sərraf