ABŞ Prezidenti Donald Trampın İranla iki həftəlik atəşkəs barədə razılığa gəlməsi beynəlxalq ictimaiyyət tərəfindən müsbət qarşılanıb.

Patrul.az xəbər verir ki, dünya liderləri bu addımı gərginliyin azaldılması üçün mühüm fürsət kimi dəyərləndirirlər.

Beynəlxalq təşkilatların və dövlətlərin rəsmi mövqeləri aşağıdakı kimidir:

Birləşmiş Millətlər Təşkilatının (BMT) baş katib Antonio Quterreşin sözçüsü tərəfindən yayılan bəyanatda  bildirilib ki, o, bütün tərəfləri “öhdəliklərinə əməl etməyə” və sazişin şərtlərinə sadiq qalmağa çağırıb. Quterreş hərbi əməliyyatlara son qoyulmasının mülki insanların həyatını qorumaq üçün təcili olduğunu vurğulayıb.

Avstraliya Baş nazir Entoni Albanese “Sky News Australia” kanalına müsahibəsində atəşkəsi “müsbət xəbər” adlandırıb. O, bunun daimi sülhə yol açacağına ümid etdiyini desə də, Trampın əvvəlki sərt ritorikasını və mülki infrastrukturu hədəf alma hədələrini tənqid edərək, bunun qlobal iqtisadiyyata ciddi ziyan vura biləcəyini qeyd edib.

Yaponiya Baş kabinet katibi Minoru Kihara mətbuat konfransında bu inkişafı “müsbət addım” kimi qiymətləndirib. “Kyodo News Agency” vasitəsilə yayılan açıqlamaya görə, Yaponiya üçün hazırda ən vacib məsələ Hörmüz boğazından təhlükəsiz keçidin təmin edilməsidir.

İraq Xarici İşlər Nazirliyi atəşkəsin regionda sabitliyin möhkəmlənməsinə və gərginliyin azaldılmasına böyük töhfə verəcəyini bildirib.

Pakistan atəşkəsin əldə olunmasında əsas vasitəçi olan Pakistanın Baş naziri Şahbaz Şərif tərəfləri 10 aprel 2026-cı il tarixində İslamabadda keçiriləcək yekun danışıqlara dəvət edib.

Atəşkəs razılaşmasına əsasən, İran Hörmüz boğazını yenidən gəmiçilik üçün açmağa, ABŞ isə iki həftə müddətinə hərbi zərbələri dayandırmağa razılaşıb.