Dərmanlar sağlamlığımız üçün nəzərdə tutulsa da, səhv saxlandıqda zərərli təsir göstərə bilər.

Bəs ev şəraitində dərmanları necə düzgün saxlamaq olar?

Patrul.az-ın araşdırmasına görə, temperatur, rütubət və işıq kimi amillər bir çox preparatın tərkibini dəyişdirir. Buna görə də evdə dərman saxlamaq elə də sadə məsələ deyil.

Ən vacib qayda odur ki, dərmanları mətbəxdə və ya hamamda saxlamaq olmaz. Bu yerlərdə rütubət və istilik yüksək olduğu üçün dərmanlar tez xarab olur. Ən uyğun yer sərin, quru və günəş şüası düşməyən otaqdır.

Soyuducuda saxlamaq isə yalnız bəzi hallarda məsləhət görülür. Məsələn, insulin, bəzi antibiotik məhlulları və göz damcıları kimi preparatlar üçün soyuducu uyğundur. Amma bütün dərmanları soyuducuya qoymaq düzgün deyil, çünki bəziləri aşağı temperaturda təsirini itirir.

Həmçinin, dərmanları orijinal qablaşdırmasında saxlamaq vacibdir. Qutuların və ya etiketlərin üzərindəki məlumat istifadə müddəti, doza və tərkib gələcəkdə çaşqınlığın qarşısını alır.

Uşaqlı ailələrdə isə dərmanlar uşaqların əli çatmayan, bağlanan dolabda saxlanmalıdır. Rəngli həblər və siroplar uşaqlar üçün adi “şirniyyat” kimi görünə bilər.

Nəticə olaraq, dərman evdə olsa belə, məsuliyyətli yanaşma tələb edir. Onları düzgün şəraitdə saxlamaq, istifadə müddətinə nəzarət etmək və artıq, köhnə preparatları vaxtında utilizasiya etmək sağlam qalmağın vacib hissəsidir.

Ləman Əlizadə