Fransada fermerlərin etiraz aksiyaları daha da sərtləşib. Avropa Birliyinin Mercosur (Cənubi Amerika Ümumi Bazarı – Braziliya, Argentina, Uruqvay və Paraqvayı birləşdirən regional ticarət bloku) ölkələri ilə bağlamağı planlaşdırdığı ticarət sazişlərinə qarşı çıxan fransız fermerlər ölkə üzrə genişmiqyaslı etirazlara başlayıblar.

Patrul.az xarici mediaya istinadən xəbər verir ki, etirazçılar bir sıra şəhərlərdə yerli icra orqanlarının binalarının qarşısına gübrə tökərək narazılıqlarını ifadə ediblər. Fermerlər bildirirlər ki, Mercosur sazişləri Latın Amerikası ölkələrindən daha ucuz kənd təsərrüfatı məhsullarının Avropa bazarına daxil olmasına şərait yaradacaq və bu da yerli istehsalçıları çətin vəziyyətə salacaq.

Aksiya iştirakçıları hesab edirlər ki, Avropa Birliyinin bu siyasəti Fransada kənd təsərrüfatının gələcəyini təhlükə altına atır. Etirazlar zamanı təhlükəsizlik tədbirləri gücləndirilsə də, bəzi bölgələrdə gərginlik müşahidə olunub.

Fermerlər tələbləri yerinə yetirilənə qədər etiraz aksiyalarını davam etdirəcəklərini bəyan ediblər. Bu hadisə Avropada kənd təsərrüfatı siyasətinə qarşı artan narazılığın növbəti nümunəsi kimi qiymətləndirilir.