Hədiyyə almaq adətən sevindirici bir jestdir, amma bəzi mədəniyyətlərdə müəyyən əşyalar uğursuzluq, ayrılıq və ya bədbəxtlik gətirən simvol sayılır. Ən maraqlısı odur ki, bu inanclar yüz illərlə formalaşıb və hələ də bir çox insan onları nəzərə alır.

Patrulaz.az bu əşyalarla sizi tanış edir:

Saat

Xüsusilə Çin mədəniyyətində saat hədiyyə etmək “ölümü xatırlatmaq” kimi yozulur. Çünki çin dilində “saat vermək” ifadəsi “ölü üçün son yola salma mərasiminə getmək” ifadəsinə bənzəyir.

Bıçaq və kəsici alətlər

Qədim inanclara görə, bıçaq, qayçı və digər kəsici əşyalar hədiyyə edilərsə, münasibətləri kəsər və dostluğu bitirər. Ona görə bəzi yerlərdə belə hədiyyə verərkən qarşı tərəfdən simvolik olaraq “pul” alınır ki, inanc pozulsun.

Corab

Türk inanclarında corab hədiyyə etmək, qarşı tərəfin evdən getməsi və ya uzaqlaşması kimi yozulur. Xüsusilə ailə daxilində sevilməz bir seçimdir.

Boş pulqabı

Boş pulqabı hədiyyə etmək maddi çətinlik gətirə bilər deyə düşünülür. Ona görə də adətə görə içərisinə mütləq simvolik bir pul qoyulur.

İnci

Bəzi Avropa mədəniyyətlərində inci hədiyyəsi göz yaşı və kədər simvolu sayılır. İnci alan insanın gələcəkdə ağlayacağına inanılır.

Şüşə qablar və güzgü

Qırılmağı asan olan əşyalar, xüsusilə güzgü, uğursuzluq və münasibətdə çatlaq kimi yozulur. Qırıq güzgü isə yeddi il bədbəxtlik inancı ilə məşhurdur.

Ayaqqabı

Bəzi ölkələrdə ayaqqabı hədiyyəsi “o ayaqqabılarla səndən uzaqlaşacaq”, bəzi hallarda isə sıxıntı yaradacağı mənasına gəlir. Bu səbəbdən sevgiliyə və ya yaxın dostlara verilməsi xoş qarşılanmır.

İnanclara baxmayaraq, müasir dövrdə insanlar bu hədiyyələri rahatlıqla verir. Amma bəziləri üçün bu cür xırda detallara fikir vermək həm qarşı tərəfə hörmət, həm də maraqlı mədəni jest ola bilər.

Ləman Sərraf