­Amerikalı alimlər son 10 ildə yeniyetmələrin yuxu rejiminin pozulduğunu araşdırıblar və maraqlı nəticə əldə ediblər: həftəsonları daha uzun yatmaq depressiya riskini əhəmiyyətli dərəcədə azalda bilər.

Gündə 8–10 saat yuxu vacibdir

Patrul.az-ın məlumatına görə, Oregon Universiteti və Nyu-York Dövlət Universitetinin Upstate Tibb Məktəbinin tədqiqatçıları 16–24 yaşlı gənclər üzərində apardıqları araşdırmada həftə içi gec yatıb erkən oyanan gənclərin kifayət qədər yuxu ala bilmədiyini, lakin həftəsonları daha çox yatdıqları zaman depressiya simptomlarının 41 faiz azalacağını müəyyən ediblər.

Oregon Universitetinin psixoloqu Melinda Casement bildirib ki, uzun müddətdir yeniyetmələrə hər gecə 8–10 saat yuxu tövsiyə olunur. Amma bu, bir çox gənc üçün praktik deyil.

“Bizim tövsiyəmiz həftəsonu yuxunu kompensasiya etməklə psixi sağlamlığı qorumaqdır”, – deyə o əlavə edib.

Araşdırmanın nəticələri nə deyir?

Sorğuda iştirak edən gənclərin iş günləri və həftəsonları yatdıqları saatlar, həmçinin kədər və ümidsizlik hissləri qeydə alınıb. Tədqiqat göstərir ki, həftəsonu alınan əlavə yuxu, iş günləri az yatmış gənclərin zehni sağlamlığına müsbət təsir göstərir. Casement deyib ki, yeniyetmələr səhər erkən oyanmaq yerinə gec yatmağa meyllidirlər və bu, yuxu rejimini daha da dəyişir.

Yuxu çatışmazlığı ciddi problemlərə səbəb olur

2025-ci ilin iyununda aparılan yeni tədqiqat isə az yatmanın beyin bölgələrində əlaqənin zəifləməsinə, bunun isə depressiya, DEHB (diqqət çatışmazlığı və hiperaktivlik pozuntusu) və şizofreniya kimi ruhi xəstəliklərlə bağlı olmasına səbəb olduğunu üzə çıxarıb.

Alimlər bildirir ki, yeniyetmələr üçün ən yaxşı üsul hər gecə tövsiyə olunan miqdarda yuxu almaqdır. Amma həftəsonları daha uzun yatmaq, gec yatıb tez oyanan gənclər üçün praktik və effektiv üsul hesab edilir.