“Bir qədəhdən nə olar ki?” – bu cümlə çox tanış səslənir. Amma həkimlər deyir ki, məsələ təkcə “bir qədəh” deyil, onun tez-tez və vərdiş halında təkrarlanmasıdır. Xüsusilə qadın orqanizmi üçün spirtli içkilərin təsiri kişilərlə müqayisədə daha sürətli və daha dərin olur.

Patrul.az-ın araşdırmasına görə, qadınların bədənində su faizi daha az, yağ faizi isə nisbətən yüksəkdir. Bu da spirtin qanda daha yüksək konsentrasiyada qalmasına səbəb olur. Nəticədə eyni miqdarda içki qadınlara daha güclü təsir edir. Həkimlər xüsusilə vurğulayır ki, müntəzəm içki istifadəsi qadınlarda alkoqol istifadə pozuntusu riskini daha sürətlə artırır. Amma məsələ yalnız asılılıq deyil.

Uzunmüddətli içki vərdişi qadınlarda qaraciyər xəstəliklərini, xüsusilə sirrozu daha erkən mərhələdə yarada bilər. Bundan əlavə, ürək-damar problemləri, yüksək təzyiq və beyin funksiyalarında zəifləmə riski də artır. Həkimlərin xüsusi diqqət çəkdiyi məqamlardan biri də budur ki, alkoqol qadınlarda hormon balansına təsir edərək menstrual pozuntulara və reproduktiv problemlərə yol aça bilər.

Daha ciddi xəbərdarlıqlardan biri isə xərçəng riski ilə bağlıdır. Elmi tədqiqatlar göstərir ki, müntəzəm spirtli içki qəbulu süd vəzi xərçəngi ehtimalını artırır. Bu risk hətta az miqdarda, amma davamlı içki istifadə edən qadınlar üçün də aktualdır.

Psixoloji tərəf də az əhəmiyyətli deyil. Bəzi qadınlar stressi azaltmaq və ya emosional gərginlikdən qaçmaq üçün içkiyə yönəlir. Amma bu, əks-effekt verir. Zamanla narahatlıq, depressiya və yuxu problemləri daha da dərinləşir. Yəni içki problemin həlli yox, onu daha mürəkkəb hala gətirən amilə çevrilir.

Həkimlər açıq şəkildə deyir ki, “təhlükəsiz səviyyə” anlayışı çox zaman yanlış başa düşülür. Bəzi beynəlxalq tövsiyələr qadınlar üçün gündə maksimum bir standart içki miqdarını “nisbətən aşağı riskli” sayır. Amma bu, tam təhlükəsiz demək deyil, xüsusilə genetik meyil, həyat tərzi və ümumi sağlamlıq vəziyyəti nəzərə alınanda.

Reallıq budur ki, içki vərdişi çox vaxt özünü büruzə vermədən inkişaf edir. Ən təhlükəli tərəfi isə budur ki, insan bunu problem kimi görməyə gec başlayır.

Ləman Sərraf