Yay aylarında temperatur yüksəldikcə insanlar sərinləmək üçün ən çox buzlu suya, soyuq qazlı içkilərə və buz əlavə edilmiş müxtəlif içkilərə üstünlük verirlər. Bir çoxlarına görə buz kimi soyuq içki istidən xilas olmağın ən sürətli yoludur. Lakin mütəxəssislər bildirirlər ki, həddindən artıq soyuq içkilər hər zaman düşündüyümüz qədər faydalı olmaya bilər və bəzi hallarda orqanizmə mənfi təsir göstərə bilər.

Patrul.az-ın araşdırmasına görə, buzlu və sərin içkilərin isti havalarda orqanizmə təsiri ilə bağlı fərqli elmi yanaşmalar mövcuddur. Araşdırmalara əsasən, buz kimi soyuq içkilər ilk anda sərinlik hissi yaratsa da, bəzi hallarda orqanizmin daxili temperatur tarazlığını qorumaq üçün əlavə enerji sərf etməsinə səbəb ola bilər. Həddindən artıq soyuq içkilər həssas insanlarda boğaz qıcıqlanması, mədə spazmı və həzm narahatlığı yarada bilər. Eyni zamanda, buzlu qazlı və şəkərli içkilər susuzluğu tam aradan qaldırmır və həddindən artıq qəbul edildikdə orqanizmin maye balansına mənfi təsir göstərə bilər.

Bununla yanaşı, mütəxəssislər bildirirlər ki, otaq temperaturunda və ya yüngül sərin su, mineral su, şəkərsiz ayran, təbii limonlu su və şəkərsiz bitki çayları isti havalarda maye ehtiyacını ödəmək üçün daha uyğun seçimlər hesab olunur.

Mütəxəssislərin fikrincə, isti havalarda əsas məqsəd yalnız sərinlik hissi yaratmaq deyil, orqanizmin maye balansını qorumaqdır. Bu səbəbdən buzlu içkilərdən ölçülü istifadə etmək, xüsusilə də şəkərli və qazlı içkiləri məhdudlaşdırmaq, daha sağlam seçim hesab edilir. İsti günlərdə düzgün maye qəbulu həm sağlamlığın qorunmasına, həm də istilərin mənfi təsirlərinin azalmasına kömək edir.

Cəmilə Cəfərzadə