Son günlər keyterinq xidmətlərinə tələbat artıb və həm marketlərdə, həm də müxtəlif tədbirlərdə hazır yeməklər təqdim olunur. Bu səbəbdən insanlar keyterinq xidməti seçərkən qidanın keyfiyyəti, təhlükəsizliyi, menyu çeşidi və digər mühüm məqamları necə qiymətləndirməli olduqlarını bilməlidirlər.

Bu barədə “Refresh Group” MMC — Qida təhlükəsizliyi üzrə konsaltinq xidmətləri göstərən şirkətin Baş İcraçı Direktoru, qida eksperti Seymur Qafarov Patrul.az-a açıqlamasında bildirib ki, keyterinq xidmətləri HACCP prinsiplərinə əsaslanaraq qida təhlükəsizliyini təmin etməlidir. Onun sözlərinə görə, məhsulların daşınması və istehlakı zamanı temperatur və müddət qaydalarına ciddi əməl olunmalıdır:

“Keyterinq xidmətləri dünyada qida təhlükəsizliyi idarəetmə prinsiplərinə əsaslanan HACCP sistemi — Hazard Analysis and Critical Control Point üzrə fəaliyyət göstərir. Bizim dilimizdə bu, ‘Təhlükənin Analizi və Kritik Nəzarət Nöqtələri Sistemi’ adlanır. Sistem tətbiq olunmazdan əvvəl qabaqcıl dünya praktikaları əsasında keyterinq xidmətlərinin fəaliyyəti qiymətləndirilir. Bu çərçivədə keyterinq xidməti seçərkən bir sıra vacib məqamlar nəzərə alınmalıdır. Ən əsas məsələ isə məhsulların daşınması zamanı temperaturun düzgün qorunmasıdır.”

Ekspertin sözlərinə görə, keyterinqdə temperatur rejimi belə olmalıdır:

1. Soyuq qidalar, qəlyanaltılar və salatlar 0–5°C intervalında daşınmalıdır. Daşıma zamanı temperatur yazılı formada qeydə alınmalıdır.
2. İsti qidalar “danger zone” adlanan 5°C–60/63°C intervalına düşməməlidir.
3. Hazırlanan isti və soyuq qidalar 2 saatdan çox saxlanılmamalıdır.
   Məsələn, burger, sendviç və ya isti yeməklər 2 saat ərzində istehlak edilməli, təqdim olunarkən temperaturu 63–65°C-dən aşağı olmamalıdır.

Seymur Qafarov həmçinin vurğulayır ki, ət məhsullarının düzgün bişirilməsi və işçilərin gigiyena qaydalarına əməl etməsi qida təhlükəsizliyinin əsas şərtlərindəndir:

“Əgər komanda ət məhsullarından, xüsusilə toyuq və ya mal ətindən istifadə edirsə, bu məhsullar 70–75°C temperatur intervalında ən azı 2 dəqiqə bişirilməlidir ki, mikrobioloji çirklənmə riski aradan qalxsın.

Hazırlanmış qidalar istehlakçıya təqdim edilərkən və ya marketlərdə satılarkən işçilərin əllərində yara və ya çapıq olmamalıdır. Onlar mütləq əlcək və baş geyimindən istifadə etməlidirlər.”

Ekspert əlavə edir ki, bütün bu kritik və vacib qaydalara riayət edildiyi təqdirdə, qəbul olunan qidalardan zəhərlənmə və digər təhlükələr minimuma enmiş olur.

Cəmilə Cəfərzadə