İranın ali dini lideri Müctəba Xamenei atəşkəsdən sonra ilk dəfə açıqlama verib.

Patrul.az İran mediasına istinadən xəbər verir ki, Xamenei İranın müharibə istəmədiyini, lakin müharibədə həlak olanların qisasının alınacağını bildirib:

“İran müharibə istəmir, amma şəhidlərimizin qisasını alacağıq. Qanuni hüquqlarımızdan imtina etmək niyyətimiz yoxdur”.

Ali lider həmçinin Hörmüz boğazı ilə bağlı diqqətçəkən açıqlama verib:

“Hörmüz boğazında yeni bir mərhələ başlayır və biz onun idarə olunmasını mütləq yeni səviyyəyə qaldıracağıq”.

Xalqın mübarizliyini yüksək qiymətləndirən Müctəba ölənlərin qanı və müharibədə xəsarət alanlar üçün qarşı tərəfdən təzminat tələb ediləcəyini vurğulayıb:

“Bu gün və bu vaxta qədər Üçüncü Müqəddəs Müdafiə dastanında cəsarətlə deyə bilərik ki, siz, İran xalqı, döyüş meydanının əsl qaliblərinə çevrilmisiniz. Düşmənlə danışıqların elan edilməsi küçələrdə iştirakın lazımsız olduğuna inandırmamalıdır.

Əgər rejim döyüş meydanında sükut dövrünə qədəm qoyubsa, meydanlarda, məhəllələrdə və məscidlərdə olmaq imkanı olan insanların vəzifəsi əvvəlkindən daha ağırdır. Hər kəs bilməlidir ki, Allah qoysa, ölkəmizə hücum edən cinayətkar təcavüzkarları qətiyyən tərk etməyəcəyik. Hər bir xəsarət üçün təzminat, şəhidlərin qanının bahasını və bu müharibə veteranları üçün fidyə tələb edəcəyik”.

Sonda Müctəba Xamenei İranın cənub qonşularına da müraciət edib:

“Cənub qonşularımıza deyirəm, siz bir möcüzənin şahidi olursunuz – ona düzgün baxın və düzgün mövqe tutun. Şeytanın yalan vədlərinə şübhə ilə yanaşın”, – deyə o əlavə edib.

Xatırladaq ki, aprelin 7-də Pakistanın vasitəçiliyi ilə 10 bənddən ibarət, 2 həftəlik atəşkəsə ABŞ, İsrail və İran ardıcıl olaraq razılıq veriblər.