Böyük Britaniyanın Baş naziri Keir Starmer qlobal hadisələr və onların nəticələri ilə bağlı Britaniya mətbuatına açıqlamalar verib.

Patrul.az xarici KİV-ə istinadla xəbər verir ki, o, açıqlamasında enerji qiymətlərinin artmasında Rusiya Prezidenti Vladimir Putin və ABŞ Prezidenti Donald Trampı günahlandırıb.

“Putinin və ya Trampın dünyadakı hərəkətləri səbəbindən ölkə daxilində ailələrin və müəssisələrin enerji xərclərinin daim dəyişməsindən bezmişəm. Ailələrə və müəssisələrə ‘beynəlxalq bazarın bir hissəsiyik, buna dözməliyik’ deyilməsini qəbul etmirəm”.

Baş nazir daha sonra ABŞ-İsrail-İran münaqişəsinin Böyük Britaniyada enerji qiymətlərini sürətlə artırdığını bildirib. O qeyd edib ki, müharibənin ilk günlərində ABŞ-nin Britaniya bazalarından hücum məqsədləri üçün istifadə etməsinə icazə verməyib və bu səbəbdən Donald Trampla əlaqələrini dayandırıb.

Starmer həmçinin ABŞ Prezidentinin İrana qarşı “Bu gecə bütün bir sivilizasiya məhv olacaq və bir daha geri qayıtmayacaq” təhdidinə də münasibət bildirib:

“Bunu çox açıq deyirəm, bunlar heç vaxt istifadə etməyəcəyim sözlərdir. Mən bu məsələyə Britaniya dəyərləri və prinsipləri çərçivəsində yanaşıram. Böyük Britaniyanın öz prinsipləri və dəyərləri var və onlar gördüyümüz hər işdə bizə yol göstərir. Mən qərarlarımı ölkənin milli maraqlarına əsaslanaraq verirəm”, – deyə rəsmi vurğulayıb.

Baş nazir İsrailin Livana hücumlarına da toxunaraq atəşkəsi dəstəklədiyini bildirib:

“Hamımızın atəşkəsin bütün detallarına çıxışı olmadığı halda bunun pozuntu olub-olmadığını demək çətindir. Amma açıq şəkildə deməliyəm ki, bu addımlar yanlışdır. Bu baş verməməlidir və dayandırılmalıdır. Məsələ təkcə texniki baxımdan razılaşmanın pozulması deyil, prinsip məsələsidir. Artıq sadəcə normal vəziyyətə qayıtmağı hədəfləmək kifayət deyil”.

Sonda Starmer vurğulayıb ki, müharibənin nəticələri uzun müddət hiss olunacaq və Böyük Britaniya bundan tam şəkildə sığortalanmayıb. O əlavə edib ki, iqtisadi artıma mane olan problemlərin aradan qaldırılması üçün Avropa Birliyi ilə daha sıx münasibətlərin qurulması hədəflənir.