“Qarabağ”a hörmət etmək lazımdır, onlar bizim oyunumuzu çətinləşdirdilər”.

Patrul.az xəbər verir ki, bunu İngiltərənin “Nyukasl” klubunun baş məşqçisi Eddi Hau UEFA Çempionlar Liqasının pley-off mərhələsində İngiltərədə “Qarabağ”a qarşı keçirdikləri oyundan (3:2) sonra mətbuat konfransında deyib.

Baş məşqçi matçın ilk dəqiqələrində açılan hesabdan və komandasının hücum cəhdlərindən danışıb:

“Bu gün qarşılaşdığımız əsas problem erkən 2:0 hesabı ilə irəlidə olmağımız idi. Bu, bizim üçün müəyyən mənada təhlükəli məqam idi. ‘Qarabağ’a hörmət etmək lazımdır, onlar oyunumuzu çətinləşdirdilər. İki top fərqi ilə irəli çıxdıqdan sonra düşünürəm ki, daha çox qol vurmaq üçün lazım olan təcililiyi göstərmədik. Bu performans üzərində düşünmək və onu təkmilləşdirmək üçün çox şey var, amma ən əsası oyunu qazanmağımızdır”.

Eddi Hau daha sonra komandasının turnirdəki çıxışını da dəyərləndirib:

“Son 1/8 finala vəsiqə qazanmaq bizim üçün böyük nailiyyətdir. Çempionlar Liqasının əvvəlində bizə heç kim şans vermirdi. Buna baxmayaraq, biz bu prosesdən həqiqətən zövq aldıq. Təzyiqli və ardıcıl oyunlar baxımından düşünürəm ki, çox yaxşı iş gördük. Bu mərhələdə kiminlə qarşılaşmağın fərqi yoxdur, hər halda çətin rəqib olur. Səfər oyununda işin böyük hissəsini biz gördük və ümumilikdə yaxşı nəticə əldə etdik”, – deyə o əlavə edib.

Xatırladaq ki, bu gecə İngiltərədə baş tutan UEFA Çempionlar Liqasının pley-off mərhələsinin cavab oyununda “Nyukasl” “Qarabağ”a 3:2 hesabı ilə qalib gələrək 1/8 finala yüksəlib. “Qarabağ” isə UEFA Çempionlar Liqasındakı mübarizəsini dayandırıb.