Rusiyanın paytaxtı Moskva şəhərində 9 May Qələbə Günü (atəşkəs) ərəfəsində 24 dron zərərsizləşdirilib.

Patrul.az xəbər verir ki, bu barədə Moskva meri Sergey Sobyanin “Telegram”da məlumat verib.

Bildirilib ki, dronların sayı mayın 7-də son bir saat ərzində ümumilikdə 24-ə çatıb.

Məlumata görə, hücumlar nəticəsində Moskva vilayətinin Naro-Fominsk rayonunda hərbi logistika mərkəzinin vurulduğu bildirilir. Hadisə yerinə dərhal təcili yardım və xilasetmə xidmətləri cəlb olunub.

Ümumilikdə Ukraynanın mayın 6-dan 7-nə keçən gecə Rusiyaya yüzlərlə dron atdığı qeyd olunur.

Rusiya Müdafiə Nazirliyinin rəsmi açıqlamasında qeyd olunur ki, mayın 6-dan 7-nə keçən gecə ölkənin 20 regionu, o cümlədən Krım və dəniz akvatoriyası üzərində ümumilikdə 347 Ukrayna dronu məhv edilib. Nəticədə təhlükəsizlik səbəbindən Moskvanın əsas hava limanlarında – Vnukovo, Şeremetyevo və Domodedovoda uçuşlara müvəqqəti məhdudiyyətlər qoyulub, onlarla reys təxirə salınıb.

Hücumlar Ukrayna Prezidenti Volodimir Zelenskinin 6 may tarixindən elan etdiyi birtərəfli atəşkəs rejimi fonunda baş verib.

Xatırladaq ki, Rusiya Prezidenti Vladimir Putin 9 May Qələbə Günü münasibətilə atəşkəs elan edib. Həmin gün keçiriləcək hərbi paradla bağlı Ukrayna tərəfi də birtərəfli atəşkəs elan etsə də, “səmada Ukrayna dronları görünə bilər” kimi mesajlar verilib.