Rusiyanın Yekaterinburq şəhərində iyunun 27-də baş verən və azərbaycanlıların həyatına son qoyan polis hücumu ilə bağlı məsul şəxslərin adları məlum olub.

Patrulaz.az xəbər verir ki, bu barədə informasiyanı “Evocation” telegram kanalı yayıb.

Məlumata görə, hadisədə birbaşa və ya dolayı şəkildə iştirak etdiyi ehtimal edilən şəxslər Yekaterinburq şəhərinin hüquq-mühafizə orqanlarında yüksək vəzifə daşıyan polislərdir. Onların vəzifə səlahiyyətlərindən sui-istifadə etməsi və bunun nəticəsində ölüm halları ilə nəticələnən insidentdə məsuliyyət daşıdıqları qeyd olunur.

Hadisə ilə əlaqədar adı hallanan şəxslər aşağıdakılardır:

Viktor Poznyak – Yekaterinburq polis idarəsinin polkovnik rütbəli rəhbəri, mütəşəkkil cinayətkar qrupun rəhbəri kimi tanıdılır;

Nikolay Poçayevets – Poznyakın müavini, istintaq idarəsinin rəisi;

Rafael Xamidulin – Poznyakın digər müavini, polkovnik-leytenant;

Aleksandr Smirnıx – Poznyakın kadrlarla iş üzrə müavini.

Məlumatda qeyd olunur ki, bu şəxslərin rəhbərliyi altında fəaliyyət göstərən strukturun vəzifə səlahiyyətlərini aşması və azərbaycanlılara qarşı zorakılıq tətbiq etməsi nəticəsində faciəli hadisə baş verib.

Hazırda məsələ ilə bağlı geniş ictimai və diplomatik reaksiyalar gözlənilir. Azərbaycanın aidiyyəti qurumları və diaspor təşkilatları hadisənin obyektiv araşdırılmasını tələb edir.

Xatırladaq ki, iyunun 27-də Rusiyanın Yakaterinburq şəhərində Xüsusi Təyinatlı Polis Dəstəsi (OMON) tərəfindən azərbaycanlıların yaşadığı evdə aparılan əməliyyat nəticəsində iki nəfər – Hüseyn və Ziyəddin Səfərov qardaşları işgəncələrə məruz qalaraq həlak olublar.