“Bu gün görkəmli alim, akademik Zərifə xanım Əliyevanın doğum günüdür. Onun adı Azərbaycan elmi və səhiyyə tarixində xüsusi yer tutur. Zərifə xanım Əliyeva oftalmologiya sahəsində böyük nailiyyətlər əldə etmiş alim idi”.

Bu fikirləri deputat Aydın Hüseynov Zərifə Əliyevanın doğum günü ilə bağlı öz təəssüratlarını Patrul.az-a bölüşərkən deyib.

Deputat bildirib ki, Zərifə Əliyeva oftalmologiya elminə verdiyi töhfələr və insanlara göstərdiyi qayğı ilə yadda qalan görkəmli alim və nümunəvi ziyalı idi:

“O, göz xəstəliklərinin öyrənilməsi ilə ciddi məşğul olmuşdur. Xüsusilə sənaye sahəsində çalışan insanların görmə problemlərini araşdırmışdır. Onun elmi işləri bu sahədə yeni yanaşmaların yaranmasına kömək etmişdir. Zərifə xanım həm də gənc alimlərin yetişməsinə böyük dəstək vermişdir.

Zərifə xanım Əliyeva yalnız alim kimi deyil, həm də nümunəvi ziyalı kimi tanınırdı. O, insanlara diqqət və qayğı ilə yanaşırdı. Onun fəaliyyəti hər zaman insan sağlamlığına xidmət edib”.

A.Hüseynov qeyd edir ki, Zərifə Əliyeva öz zəngin elmi irsi, insanpərvərliyi və yüksək mənəvi dəyərləri ilə Azərbaycan xalqının yaddaşında daim yaşayır:

“Zərifə xanım Əliyeva, eyni zamanda, Azərbaycan xalqının ümummilli lideri Heydər Əliyevin həyat yoldaşı idi. Bu ailə Azərbaycan tarixində mühüm rol oynamışdır. O, həm də Azərbaycan Respublikasının Prezidenti İlham Əliyevin anasıdır.

Bu gün Zərifə xanım Əliyevanın xatirəsi böyük hörmətlə yad edilir. Onun elmi irsi və mənəvi dəyərləri gələcək nəsillər üçün örnək olaraq qalır”.

Cəmilə Cəfərzadə