Naftalandan Qalaaltıya: Azərbaycan wellness turizminin İnsanlar artıq yalnız dincəlmək üçün deyil, həm də sağlamlaşmaq və bərpa olunmaq üçün səyahət edirlər. Bu tendensiya “wellness turizmi” kimi tanınır və dünya üzrə sürətlə inkişaf edir. Azərbaycanda isə təbii resurslar, müalicəvi mineral sular və sanatoriya imkanları bu sahənin inkişafı üçün geniş potensial yaradır.

Bəs “wellness turizmi” nədir? 

Patrul.az-ın araşdırmasına görə, “Wellness turizmi” insanların fiziki, psixoloji və emosional sağlamlığını yaxşılaşdırmaq məqsədilə həyata keçirdiyi səyahət növüdür. Bu turizm istiqaməti xəstəliyin müalicəsindən daha çox sağlamlığın qorunmasına, stressin azaldılmasına və həyat keyfiyyətinin yüksəldilməsinə yönəlib. Buraya spa və termal mərkəzlərdə istirahət, yoqa və meditasiya proqramları, sağlam qidalanma, detoks proqramları, təbiət qoynunda aktiv istirahət və müxtəlif reabilitasiya xidmətləri daxildir.

Son illərdə bu sahə dünyanın ən sürətlə inkişaf edən turizm istiqamətlərindən birinə çevrilib. “Global Wellness Institute” təşkilatının məlumatına görə, pandemiyadan sonra insanlar sağlam həyat tərzinə daha çox üstünlük verməyə başlayıb və bu da wellness turizminə marağı əhəmiyyətli dərəcədə artırıb. Mütəxəssislər hesab edirlər ki, yaxın illərdə də bu bazarın böyüməsi davam edəcək.

Wellness turizmi çox vaxt tibbi turizmlə qarışdırılır. Halbuki bu iki anlayış arasında ciddi fərq var. Tibbi turizmdə insanlar cərrahi əməliyyat, stomatoloji müalicə və ya digər tibbi prosedurlar üçün başqa ölkəyə səfər edirlər. Wellness turizmində isə əsas məqsəd xəstəliklərin müalicəsi deyil, sağlamlığın möhkəmləndirilməsi, orqanizmin bərpası və gələcək sağlamlıq risklərinin azaldılmasıdır.

Bu istiqamətin populyarlaşmasının əsas səbəblərindən biri də müasir həyatın yaratdığı stress, oturaq həyat tərzi və psixoloji gərginlikdir. Bir çox insan istirahətini artıq sadəcə oteldə qalmaqla deyil, eyni zamanda sağlamlığını yaxşılaşdıracaq proqramlarla birləşdirməyə üstünlük verir. Məhz buna görə spa mərkəzləri, termal sular, dağ kurortları və ekoloji təmiz məkanlar daha çox diqqət cəlb edir.

Azərbaycanın da wellness turizmi sahəsində ciddi üstünlükləri var. Ölkədə uzun illərdir tanınan Naftalan nefti, Qalaaltı mineral suyu, Masallı, Lənkəran və digər bölgələrdəki termal və mineral su mənbələri müalicəvi xüsusiyyətləri ilə seçilir. Dağlıq ərazilərin təmiz havası, meşəlik zonalar, milli parklar və müxtəlif sanatoriyalar da sağlamlıq turizmi üçün əlverişli şərait yaradır.

Mütəxəssislərin fikrincə, bu potensialdan səmərəli istifadə etmək üçün müasir wellness mərkəzlərinin yaradılması, beynəlxalq standartlara uyğun xidmətlərin göstərilməsi və ölkənin sağlamlıq turizmi istiqamətində daha fəal tanıdılması vacibdir. Bu, həm xarici turistlərin cəlb edilməsinə, həm də daxili turizmin inkişafına töhfə verə bilər.

Ekspertlər hesab edirlər ki, gələcəyin turizmində əsas prioritetlərdən biri məhz sağlamlıq olacaq. İnsanlar artıq səyahətdən yalnız xoş xatirələrlə deyil, həm də özlərini daha enerjili, dincəlmiş və sağlam hiss edərək qayıtmaq istəyirlər. Wellness turizmi də məhz bu ehtiyacı qarşılayan ən perspektivli istiqamətlərdən biri kimi qiymətləndirilir.

Ləman Sərraf