Aİ Komissiyası ABŞ-ın yeni polad və alüminium tariflərinin ədalətsiz olduğunu və onlara qarşı sürətli və mütənasib əks tədbirlərin görüldüyünü açıqladı.

Patrulaz.az xarici KİV-ə istinadən xəbər verir ki, bəyanatda ABŞ-ın rüsum tətbiq etmək qərarının transatlantik ticarəti pozacağı, biznes və istehlakçılara zərər verəcəyi və qiymətlərin yüksəlməsinə səbəb olacağı qeyd edilib.

Aİ Komissiyasının yeni tariflərə diqqətlə düzəldilmiş iki mərhələli cavab verəcəyi ifadə edilən açıqlamada, birinci mərhələnin daha əvvəl hazırlanmış və dayandırılmış əks tədbirlərin aktivləşdirilməsi olduğu vurğulanıb və bunun 1 aprel tarixindən etibarən qüvvəyə minəcəyi, iqtisadi zərərə cavab olaraq 8 milyard avro dəyərində bir sıra ABŞ məhsullarının hədəf alınacağı bildirilib.

Açıqlamada qeyd olunub ki, ikinci mərhələ Aİ-nin 18 milyard avrodan çox ixracatına təsir edən ABŞ tariflərinə uyğun olacaq və aprelin 13-də qüvvəyə minəcək yeni tədbirləri əhatə edəcək.

Açıqlamada, əks tədbirlərin ABŞ-ın tariflərinin iqtisadi miqyasına uyğun gələn 26 milyard avro dəyərində ABŞ məhsullarına yönəldiləcəyi, problemin həll olunacağı təqdirdə Aİ-nin həll üçün danışıqlara hazır olduğu və tədbirlərdən geri çəkiləcəyi də vurğulanıb.

ABŞ-ın polad və alüminium idxalına 25 faizlik tarifləri martın 12-dən (bu gündən) qüvvəyə minib.