2 iyul 2025-ci il – Azərbaycan polisi 107 yaşını qeyd edir.

Bu gün Azərbaycan hüquq-mühafizə orqanlarının əsas sütunlarından biri olan polis sisteminin formalaşmasından 107 il ötür. 1918-ci ilin iyul ayının 2-də Azərbaycan Xalq Cümhuriyyəti hökumətinin qərarı ilə daxili işlər orqanları yaradıldı və milli polis sistemi təsis olundu. Bu tarixi gün 1998-ci ildə Ulu Öndər Heydər Əliyevin sərəncamı ilə Azərbaycan Polisi Günü kimi rəsmiləşdirildi və hər il qeyd olunur.

Azərbaycan polisi təkcə ictimai asayişin qorunması ilə kifayətlənməyib, ölkənin müstəqilliyi, suverenliyi və ərazi bütövlüyü uğrunda aparılan mübarizədə də ön sıralarda yer alıb. Xüsusilə, 1990-cı illərin mürəkkəb dövründə və Qarabağ müharibəsi zamanı çoxsaylı polis əməkdaşı vətən uğrunda canından keçib, şəhidlik zirvəsinə ucalıb.

Azərbaycan polisi 2020-ci ildə baş vermiş İkinci Qarabağ müharibəsində də fəal iştirak edib. Müharibə dövründə daxili işlər orqanlarının əməkdaşları ön cəbhəyə yollanaraq döyüşlərə qatılıb, həmçinin işğaldan azad olunan ərazilərdə təhlükəsizlik və asayişin təmin edilməsində mühüm rol oynayıblar. Onlarla polis əməkdaşı şəhid olub, yüzlərlə əməkdaş yaralanıb. Onların bu qəhrəmanlığı dövlət və xalq tərəfindən yüksək qiymətləndirilir.

Bu gün Azərbaycan polisi yalnız cinayətkarlıqla mübarizə aparan qurum deyil, eyni zamanda cəmiyyətin sabitliyini, ictimai təhlükəsizliyi təmin edən və insan hüquqlarını qoruyan bir struktur kimi fəaliyyət göstərir. Prezident İlham Əliyevin rəhbərliyi ilə hüquq-mühafizə sistemində aparılan islahatlar nəticəsində daxili işlər orqanlarının fəaliyyətində şəffaflıq, çeviklik və vətəndaş məmnunluğu ön plana çıxarılıb.

Azərbaycan Respublikasının daxili işlər naziri, general-polkovnik Vilayət Eyvazov bu əlamətdar gün münasibətilə daxili işlər orqanlarının əməkdaşlarını və veteranlarını təbrik edərək, onların fədakar və şərəfli xidmətini yüksək qiymətləndirib. Nazir qeyd edib ki, Azərbaycan polisi daim vətəndaşların təhlükəsizliyi və cəmiyyətin sabitliyi naminə fəaliyyət göstərir. Onun rəhbərliyi dövründə ictimai qəbullar, problemlərin yerində öyrənilməsi və strukturun çevikləşdirilməsi istiqamətində ardıcıl addımlar atılıb.

Polisin cəmiyyətlə qarşılıqlı əməkdaşlığı son illərdə daha da dərinləşib. Təcili çağırışlara operativ cavab, vətəndaşlara yönəlik maarifləndirici tədbirlər, həmçinin rəqəmsal texnologiyalardan istifadə daxili işlər orqanlarının çevik və müasir quruma çevrilməsinə səbəb olub. Xüsusilə pandemiya və post-müharibə dövrlərində polisin fədakar fəaliyyəti cəmiyyətin etimadını daha da artırdı.

Bu gün xidmətdə olan minlərlə polis əməkdaşı öz vəzifə borcunu şərəflə yerinə yetirir. Onlar hər gün – bayramda da, tətil günlərində də ictimai asayişin keşiyində dayanır, təhlükəsiz bir cəmiyyətin varlığı üçün əllərindən gələni edirlər.

Azərbaycan polisinin 107 illik yubileyi münasibətilə bütün polis əməkdaşlarını və veteranlarını təbrik edir, onlara möhkəm can sağlığı, məsuliyyətli və şərəfli xidmətlərində uğurlar arzu edirik.

Azərbaycan polisi – sabitliyin, təhlükəsizliyin və vətəndaş rifahının qarantıdır!

Patrul.az