Qan laxtalanması bədənin zədələnməyə qarşı təbii müdafiə mexanizmidir, lakin bu proses lazım olandan artıq baş verdikdə təhlükəli hala çevrilə bilər. Damarların içində yaranan laxtalar qan dövranını pozur və həyati orqanlara gedən qan axınını azalda bilər.

Bəs qan laxtalanmasının əlamətləri hansılardır?

Patrul.az–ın araşdırmasına görə, əlamətlər laxtanın harada əmələ gəlməsindən asılıdır:

Ayaqlarda laxta (Dərin ven trombozu)

Ən çox rast gəlinən formadır. Əlamətlər arasında şişkinlik, qızartı, istilik hissi və ağrı olur. Xüsusilə bir ayağın digərindən fərqli şişməsi ciddi xəbərdarlıqdır.

Ağciyərdə laxta (ağciyər emboliyası)

Laxta qandan ayrılıb ağciyərə keçdikdə nəfəs darlığı, sinə ağrısı, sürətli ürək döyüntüsü və qəfil halsızlıq yaranır. Bu vəziyyət həyati təhlükə yarada bilər və təcili tibbi yardım tələb edir.

Beyin damarında laxta (insult riski)

Qan laxtası beyinə gedən damarları bağladıqda, üzün bir tərəfində keyimə, danışıq pozğunluğu və əzələ zəifliyi baş verir. Bu, dərhal tibbi müdaxilə tələb edən haldır.

Qan dövranında ümumi əlamətlər

Bəzən bədəndə izaholunmaz ağrılar, başgicəllənmə, görmə bulanıqlığı və ya soyuq ətraf hislər də laxtalanmanın dolayı əlaməti ola bilər. Qanın laxtalanması səssiz şəkildə inkişaf edə bilər, amma nəticəsi qəfil və ciddi olur. Əgər bədəndə səbəbsiz şişkinlik, ağrı və ya nəfəs darlığı hiss edirsənsə, bunu laqeyd yanaşmaq olmaz – bəzən bir saniyəlik gecikmə, bir həyatlıq fərq yarada bilər.

Ləman Sərraf