D vitamini günəşin bizə bəxş etdiyi ən vacib vitaminlərdən biridir. Amma bir çox insan, xüsusilə də bağlı məkanlarda çalışanlar, yaşlılar və az günəş görən bölgələrdə yaşayanlar, bu vitamindən məhrum qalır. Nəticədə, bədən zəifləyir, sümük quruluşu pozulur, hətta psixoloji problemlər belə ortaya çıxa bilir.

Patrulaz.az orqanizmdə D vitamini çatışmadıqda nələr baş verdiyi haqqında yazır:

Sümük və əzələ ağrıları

D vitamini kalsiumun sorulmasını təmin edir, bu da sümük quruluşunun möhkəmliyi üçün vacibdir. Əgər çatışmazlıq varsa, sümük əriməsi, əzələ zəifliyi və ağrılar, uşaqlarda raxit xəstəliyi kimi problemlər ortaya çıxa bilər.

Kronik yorğunluq və enerji azlığı

Gün ərzində kifayət qədər yatdığın halda belə yorğunluq hiss edirsənsə, bunun səbəbi D vitamini əskikliyi ola bilər. Bu vitamin enerji mübadiləsini dəstəklədiyi üçün çatışmadıqda bədən daim halsız olur.

Zəifləmiş immun sistemi

D vitamini orqanizmin infeksiyalara qarşı müdafiəsini gücləndirir. Əks halda, soyuqdəymə, qrip və digər xəstəliklərə qarşı müqavimət azalır, insan tez-tez xəstələnir.

Depressiya və əhval dəyişkənliyi

Beyindəki “xoşbəxtlik hormonları” olan serotonin və dopaminin ifrazına təsir edən bu vitaminin çatışmazlığı, əhval dəyişkənliyinə, motivasiya itkisinə və depressiv əlamətlərə səbəb ola bilər.

Dəri və saç problemləri

Dəri hüceyrələrinin yenilənməsinə və saç köklərinin sağlamlığına təsir edən D vitamini çatışmadıqda, dəridə solğunluq, saç tökülməsi, quruluq və sızanaq kimi problemlər baş qaldırır.

Bütün bunlar o deməkdir ki, D vitamini sadəcə bir vitamin deyil, o, bədənin hər sisteminə təsir edən bir gücdür.

Ləman Sərraf